Тогтвортой хөгжлийн зорилтуудын нээлттэй өдөрлөг зохион байгуулна

Нийслэлийн Засаг дарга бөгөөд Улаанбаатар хотын Захирагч Д.Сумъяабазар НҮБ-ын Монгол дахь Суурин зохицуулагч Тапан Мишраг хүлээн авч уулзлаа.

 

НҮБ-ын Монгол дахь Суурин зохицуулагч Тапан Мишра НҮБ-аас Монгол Улсад 2023-2027 онд хэрэгжүүлэх “Тогтвортой хөгжлийн хамтын ажиллагааны хүрээ” баримт бичгийг Монгол Улсын Засгийн газартай байгуулсныг дурдаад, цаашид баримт бичигт стратегийн тэргүүлэх гурван чиглэлийг тодорхойлсон. Үүнд хүний хөгжил, ногоон хүртээмжтэй, тогтвортой эдийн засгийн өсөлт, хүн төвтэй засаглал, эрх зүйт ёс, хүний эрх орсон бөгөөд энэ хүрээнд цаашид харилцаа, хамтын ажиллагаагаа өргөжүүлэх хүсэлтэйгээ илэрхийллээ. Мөн тэрбээр Тогтвортой хөгжлийн зорилтуудын нээлттэй өдөрлөгийг ирэх есдүгээр сард зохион байгуулахад нийслэлтэй хамтран ажиллах хүсэлтэй байна гэв.

 

 

Нийслэлийн Засаг дарга бөгөөд Улаанбаатар хотын Захирагч Д.Сумъяабазар Улаанбаатар хотын эрх зүйн байдлын тухай хуулийн шинэчилсэн найруулгыг батлуулснаар нийслэл хот нийгэм, эдийн засгийн хувьд бие даан хөгжих санхүү, эрх зүйн чадамжтай болж, цаашид НҮБ болон түүний системийн байгууллагуудтай хамтран ажиллах боломж нэмэгдэж буйг онцоллоо. Түүнчлэн Улаанбаатар хотын өрхийн орлогыг нэмэгдүүлэх, хотыг илүү ногоон, хүртээмжтэй бөгөөд хөгжлийн бэрхшээлтэй иргэдэд ээлтэй хот болгохын төлөө нийслэлийн зүгээс анхааран ажиллаж буйг дурдаж, дээрх чиглэлүүдэд хамтран ажиллах өргөн боломж байгааг хэлсэн юм. Мөн Тогтвортой хөгжлийн зорилтуудын нээлттэй өдөрлөгийг зохион байгуулахад нийслэл дэмжин ажиллахаа илэрхийлэв.

 

 

НИЙСЛЭЛИЙН СУРГАЛТ, СУДАЛГАА, ОЛОН НИЙТТЭЙ ХАРИЛЦАХ ГАЗАР

Similar Posts

0 0 Санал
Үнэлгээ
Бүртгүүлэх
Мэдэгдэх
guest
0 Сэтгэгдэл
Inline Feedbacks
View all comments