Ерөнхийлөгч амьтны хүрээлэнгийн унаганд “Дагина” нэр өгчээ
Монгол Улсын Ерөнхийлөгч У.Хүрэлсүх Чех Улсад төрийн айлчлал хийв
Монгол Улсын Ерөнхийлөгч Ухнаагийн Хүрэлсүх энэ долоо хоногт Чех Улсад төрийн айлчлал хийлээ. Айлчлалын үеэр тэрээр Прага хотын Амьтны хүрээлэнд зочилж, шинээр байгуулагдсан “Говь” хэсэгт төрсөн анхны тахийн унаганд нэр өгөх ёслолд оролцов.
Ерөнхийлөгч төрөөд 14 хонож буй охин унаганд “Дагина” хэмээх нэр хайрлаж, Прага хотын Амьтны хүрээлэнгийн тахийн удмын бүртгэлд 7000 дугаараар бүртгүүлсэн байна.
Тахь нутагшуулах төсөл ба хамтын ажиллагаа
Прага хотын Амьтны хүрээлэн нь Монголын Сүмийн хоолойд тахь нутагшуулах төсөл хэрэгжүүлдэг бөгөөд айлчлалын үеэр энэ төслийг цаашид өргөжүүлэх талаар хэлэлцжээ. Монгол Улсын Ерөнхийлөгч төслийг бүрэн дэмжиж буйгаа илэрхийлсэн байна.
Түүнчлэн хоёр тал нэн ховордсон хавтгайг авран хамгаалах хамтын ажиллагааны санамж бичигт гарын үсэг зурсан. Үүний хүрээнд:
- Прага хотын Амьтны хүрээлэн хавтгайг хамгаалах гол түнш болно.
- Европын амьтны хүрээлэнгүүдэд хавтгайн нөөц популяци бий болгох ажлыг эхлүүлнэ.
Мазаалайг хамгаалах олон улсын хурал зохион байгуулна
Ерөнхийлөгч У.Хүрэлсүх Чехийн талд говийн мазаалайг авран хамгаалах ажлыг хамтран хэрэгжүүлэх санал тавив. Одоогийн байдлаар ердөө 50 орчим мазаалай үлдээд буй тул хамгааллын ажилд олон улсын хамтын ажиллагаа шаардлагатай гэж үзэж байна.
Үүнтэй уялдуулан ойрын хугацаанд Прага хотноо мазаалайг хамгаалах олон улсын эрдэм шинжилгээний хурал зохион байгуулахаар болжээ.
