П.Анужин: “Хуулийн төслөө тат” гэж Х.Булгантуяа, Х.Ганхуяг нарт хэлсэн ч ТАТААГҮЙ

Хөрөнгө   оруулалтын  тухай хуульд нэмэлт өөрчлөлт оруулах тухай хуулийн төсөлд  50 мянган ам.доллар оруулж ирвэл оршин суух эрх олгох тухай заалт олон нийтийн шүүмжлэл дагуулж буй. Уг хуулийн төслийг санаачилсан УИХ-ын гишүүн Х.Ганхуяг, хамт өргөн барьсан УИХ-ын гишүүн Х.Булгантуяа, П.Анужин, Д.Өнөрболор нарыг хуулийн төслөө татахыг олон нийтээс шаардаж буй.

Үүний дараа УИХ-ын гишүүн П.Анужин, Д.Өнөрболор нар шүүмжлэл дагуулаад буй зүйл заалт хуулийн төсөлд гарын үсэг зурах үед байгаагүй, танилцуулж мэдэгдэлгүй оруулж ирсэн” гэх тайлбарыг олон нийтийн сүлжээнд хийсэн.

Тэгвэл УИХ-ын гишүүн П.Анужингаас дээрх асуудалтай холбогдуулан zarig.mn сайт  тодруулжээ. 

УИХ-ын гишүүн П.Анужин “Монгол Улсын эрх ашиг, тусгаар тогтнол, аюулгүй байдалтай холбоотой  хуулийн төсөл явж байхад үг, үсгийг нь уншихгүй гарын үсэг зураад явуулдаг УИХ-ын гишүүн  байхгүй болов уу гэж итгэж байна. Миний хувьд энэ зарчмыг баримталдаг. Орж ирсэн хуулийн төслүүдийн зүйл заалт, өөрчлөлт бүрийн үг үсэг байтугай, цэг таслалыг  ч хардаг. Тэгэхээр уншихгүйгээр хуулийн төсөлд гарын үсэг зурах боломжгүй.

Хөрөнгө оруулалтын тухай хуулийг өөрчлөх санал, үзэл баримтлал, агуулгыг бол би дэмжсэн. Харин хууль санаачлагч, боловсруулагч УИХ-ын гишүүн Х.Ганхуяг шинээр нэмсэн  зүйл заалтаа танилцуулахгүйгээр байнгын хороо, УИХ-д оруулж ирсэн. тодруулбал, бидэнд танилцуулаагүй зүйлээ оруулж ирсэн гэсэн үг.

Хууль санаачлагч гишүүн Х.Ганхуягтай би уулзаж “Юу оруулаад ирэв, энэ хуулиа тат гэдгийг Х.Булгантуяа, Х.Ганхуяг нарт хэлсэн ч татаагүй. Тэгэхээр энэ  хуулийн төслийг санаачилсан, энэ заалтыг оруулж ирсэн гишүүдээс нь хариулт авах нь зөв байх.  Х.Ганхуяг гишүүн  яагаад өнөөдрийг хүртэл энэ асуудлынхаа учир шалтгааныг ард иргэдэд хэлэхгүй байгаа юм бэ. Энэ бол хувь хүний асуудал биш” гэх тайлбар өглөө.