|

Хот хоорондын автобус мөргөлдөж хоёр хүн нас барж, 11 иргэн гэмтжээ

Говь-Алтай аймгийн Шарга сумын төвөөс зүүн хойд зүгт 50 км-т Сондуулт багийн “Улаан тээг” гэдэг газар хот хооронд зорчиж явсан том оврын автобус болон суудлын автомашин мөргөлдсөн ноцтой осол өнгөрсөн шөнө болжээ. Үүний улмаас хоёр хүн нас барж, 11 хүн гэмтэж бэртжээ.

Энэ тухай дуудлагыг онцгой байдлын алба хоёрдугаар сарын 24-ний өдөр Цагдаагийн байгууллагаас хүлээн авсан. Дуудлагын дагуу тус аймгийн Онцгой байдлын газрын Эрэн хайх, аврах бүлгийн 4 алба хаагч  очиход Ховд аймгийн Жаргалант сумаас Улаанбаатар хотын чиглэлд зорчиж явсан “Грандбирд” загварын том оврын автобус, Говь-Алтай аймгийн Есөнбулаг сумаас Баян-Өлгий аймгийн чиглэлд явсан “Кроун” загварын суудлын автомашинтай мөргөлдсөн байжээ.

Ослын улмаас Баян-Өлгий аймгийн харьяат 29 настай эрэгтэй болон Ховд аймгийн харьяат 56 настай эмэгтэй нар автомашины төмөр хийцэд хавчуулагдан нас барсан байсныг Цагдаагийн байгууллагад, бэртэж гэмтсэн 11 хүнийг Эмнэлгийн байгууллагад тус тус шилжүүлэн өгсөн хэмээн Онцгой байдлын ерөнхий газраас мэдээллээ.

Жолооч та бүхэн орон нутгийн замд хурдаа тохируулж, дүрмээ баримтлан хөдөлгөөнд оролцоно уу. Мөн хэт ядарсан үедээ жолоо барихгүй байх, хол ойрын гэрлээ шилжүүлэх, тээврийн хэрэгслийнхээ бүрэн бүтэн байдлыг ханган хөдөлгөөнд оролцож байхыг зөвлөж байна.

Similar Posts

0 0 Санал
Үнэлгээ
Бүртгүүлэх
Мэдэгдэх
guest
0 Сэтгэгдэл
Inline Feedbacks
View all comments