Иргэдийн хандиваар “Тэнгэрийн андлал” цогцолбор баригдаж дуусав
Одоогоос гурван жилийн өмнө Л.Оюун-Эрдэнэ Засгийн газрын хэрэг эрхлэх газрын дарга байхдаа “Андлалын хөшөө цогцолбор байгуулан Монголд 400 сая жуулчин хүлээн авна” гэсэн нь олны шүүмжлэл дагуулж байлаа. Төрсөн нутгаа хөгжүүлж, Хэнтий аймгийг аялал жуулчлалын бүс нутаг болгож, 400 сая жуулчин татах том мөрөөдөл түүнд байсан ч бодит байдал дээр иргэдийн хүлээлтийг давж чадалгүй сошиалд хэдэн шог зуран нэмээд дууссан юм.
“Андлалын өргөө” цогцолбор оюуны өмчийн асуудлаар энэ оны наймдугаар сард нураагдаж буурин дээрээ шинэ бүтээн байгуулалт хийх талаараа мэдээлэл хийж байсан билээ.
Иргэдийн хандиваар хуучин “Андлалын хөшөө”-ний буурин дээр хоёр сарын хугацаанд “Тэнгэрийн андлал” цогцолборыг МУУСГЗ, барималч А.Очирболдын туурвилаар барьсан байна. Энэхүү хөшөөнд Монголын нууц товчоон дахь Тэмүүжин, Боорчи хоёрын анд бололцох үеийг дүрсэлсэн гэнэ.
