Японы ЭМЯ-ны зөвлөл иргэдээ вакцины нэмэлт тунд хамрагдахыг зөвшөөрчээ
Японы Эрүүл мэндийн яамны зөвлөл тус улсын бүх оршин суугчийг коронавирусийн эсрэг вакцины нэмэлт тунд хамруулахыг зөвшөөрчээ. Гэхдээ иргэд хоёр дахь тунгаа тариулснаас хойш дор хаяж найман сарын дараа гурав дахь тундаа хамрагдах боломжтой аж.
ОУ-ын эрдэмтдийн судалгаагаар вакцины үр нөлөө нь зургаан сар орчим үргэлжилдэг бөгөөд бүх насны хүмүүсийн эсрэг бие тодорхой хугацааны дараа багасдаг гэж тогтоогдсон тул Япон улсын эрх баригчид ийм шийдвэр гаргасан гэжээ.
Харин гурав дахь тундаа өмнө нь хийлгэсэн вакцинаас өөр вакцин тариулж болох эсэхийг Японы Эрүүл мэнд, хөдөлмөр, нийгмийн хамгааллын яамнаас ирэх арван нэгдүгээр сард албан ёсоор шийдвэрлэх гэнэ.
Одоогийн байдлаар Япон улсад “Пфайзер” болон “Модерна” вакциныг 12 ба түүнээс дээш насны хүмүүст үнэ төлбөргүй тарьж байгаа билээ. Түүнчлэн, “АстраЗенека” вакцинд зөвшөөрөл олгосон хэдий ч зөвхөн 40 ба түүнээс дээш насны хүмүүст зөвлөж байгаа юм.
