Он гарснаас хойш ахуйн гал түймрийн улмаас 44 том хүн, 13 хүүхэд энджээ

Хүйтэн сэрүүний эрч орж, гэр хорооллын айл өрхүүдийн галлагаа эхэлж байгаатай холбогдуулан гэр ахуйн гал түймэр болоод угаартаж нас барсан иргэд нэмэгдсээр байгаа билээ.

Тэгвэл он гарснаас хойш улсын хэмжээнд 2,349 удаагийн ахуйн гал түймрийн дуудлага бүртгэгдэж, 57 иргэн амь насаа алдсан байна. Үүний 44 нь том хүн, 13 нь хүүхэд байсан аж.

Иймд гал түймрийн аюулаас ОБЕГ урьдчилан сэргийлэх дараах зөвлөмжийг хүргэж байна.

• Үнс нурмаа ил задгай асгахгүй байх,
• Гэр орондоо зул, хүж асаахдаа галын аюулгүй байдлыг хангаж, хараа хяналтгүй орхихгүй байх,
• Шингэрүүлсэн шатдаг хийгээр ажилладаг тулга, зуухыг ашиглахдаа аюулгүй ажиллагааны дүрэм журмыг баримтлан анхаарал болгоомжтой байх, (шаардлагатай тохиолдолд мэргэжлийн байгууллагаас зөвлөгөө авах)
• Цахилгаан ашиглалтын дүрэм журмыг сайтар мөрдөж, эвдрэл гэмтэлтэй, зориулалтын бус цахилгаан хэрэгсэл ашиглахгүй байх,
• Автомашины зогсоол, ил зогсоолд автомашинаа байрлуулахдаа галын аюулгүйн зай хэмжээг баримтлан хэт шахаж байрлуулахгүй байх,
• Байр орон сууцны орчимд шуурхай албаны автомашин орох, гарах гарцыг бөглөж автомашинаа байрлуулахгүй байх,
• Цахилгаан хэрэгслийг хүчдэлээс салгаж орхих,
• Бага насны хүүхдийг харж асрах хүнгүйгээр гэрт нь цоожилж орхихгүй байхыг анхаарууллаа.