|

Г.Доко: Өдөржин өндөгний шар, цагааныг ялгахаас нарийн боов үйлдвэрлэх ажлаа эхэлж байлаа

Авъяаслаг, ажилсаг гэрийн эзэгтэй нарыг эгнээндээ нэгтгэсэн  122 мянган гишүүнтэй  “MommyDoko” группийн үүсгэн байгуулагч, мэргэжлийн нарийн боовны тогооч Г. Долгор (Доко)-той ярилцлаа. 

-Та  манай уншигчдад өөрийгөө танилцуулахгүй юу? 

-Анх удаа л ийм ярилцлага өгч байна. Та бүхэнд баярлалаа. Намайг Гомбодорж овогтой Долгор гэдэг. Булган аймагт төрж, тэндээ арван жилээ төгссөн. МУИС-д сурч байгаад, Москвад их сургуульд сурч Сэтгэл зүйч, сурган хүмүүжүүлэгч мэргэжил эзэмшсэн. Түүнээс хойш  Москва хотод 10 гаран жил амьдарч байна. Одоо  “Принцесса Шоко” бейкерид нарийн боовны тогоочоор ажилладаг. Нарийн боовны тогооч бол миний 2 дахь мэргэжил. Москвагийн хүнсний коллежийг энэ чиглэлээрээ төгсч  байсан.

Уг нь монголдоо жил болгон очдог байсан юм. Ковид19 гарснаас хойш   2 жил  очиж чадаагүй, суурин байна даа. 

НАРИЙН БООВНЫ ТОГООЧ БОЛ МИНИЙ ХОЁР ДАХЬ МЭРГЭЖИЛ

 

(24 цагийн дотор хоёулхнаа хийсэн 45 кг жинтэй бялуу)

-Сэтгэл зүйч мэргэжлээр төгссөн хүн  нарийн боов, бейкери хийдэг болж. Энэ салбар луу ороход танд  юу хамгийн их нөлөөлсөн  бэ?

-Би хөдөө өвөө эмээ дээрээ өссөн хөдөөний хүүхэд. Одоо үед хөдөөний хүмүүс их муу нэртэй болж дээ. Өвөөтэйгөө хонинд явж, эмээтэйгээ цагаан идээ боловсруулж л өслөө. Хөдөө цагаан идээ яаж хийдгийг сайн мэддэг, аарц, цөцгий, кремчиз (Cream cheese)  зэргийг бусдаас арай сайн ойлгож, ялгадаг болохоор ажилд ч, цаашлаад бүлгэмдээ контент хийхэд их дөхөмтэй байдаг.

Бага охин маань ой арай хүрээгүй, гэртээ хүүхдээ хардаг байх үед миний амьдардаг дүүргийн сошиал бүлэгт бялууны чимэглэл хийж, жигнэмэг дээр төрөл бүрийн зураг зурж зардаг орос  бүсгүй байсан юм.  Хүмүүс ч их захиалга өгдөг байлаа. Тэгээд л энэ бүсгүй шиг хийж сураад, зардаг болох юмсан гэж бодож эхэлж байгаа юм. Ингээд  Youtube үзэж,  онлайнаар сурч эхэлсэн дээ. Орост ер нь өөрсдөө гэртээ бялуу хийдэг хүмүүс их. Гэхдээ тодорхой зурагтай чимэглэл хийдэг нь ховор болохоор эрэлттэй байдаг байх. Удалгүй нөгөө үлгэр дууриалал авсан бүсгүйтэй танилцаад, жигнэмгээс нь худалдаж аваад, яаж хийхийг нь заалгаж байсан. Дараа нь Моммидоко  групптээ тэр бүсгүйтэй цуг, би орчуулаад лайв хийж байсан. Тэр үед манай  групп  цөөхөн хүнтэй байсан. 

 

 

 Анхандаа гэрээрээ  жигнэмэг будаж захиалга авдаг байлаа. Үүнийхээ хажуугаар бялуугаа ч хийж сурсан. Тэгээд энэ чиглэлээрээ ажиллаж илүү туршлагатай болъё гээд ажил хайтал  мэргэжлийн үнэмлэхтэй байх шаардлага гарч Москвагийн хүнсний коллежид суралцсан.  Коллежид сурангаа Мгимо их сургуульд байрладаг кейтирингт дадлага хийж сүүлдээ тэндээ   ажилладаг болсон. Анх бол өндөгний шар, цагааныг өдөржин ялгаж зогсдог үүрэгтэй байлаа. Дараа нь жигнэмэг, тарт хийдэг зуурмаг бэлдэх ажилд хуваарилагдаж бөөн баяр болж байснаа санадаг юм. 

Бас эмээ маань “Гурил сайхан элдэж сурах ч эрдэм шүү” гээд өөрөө зуураад надаар гурил элдүүлдэг байсан. Тэгсэн анх ажилд ороход мусс, пирожные доор тавьдаг нимгэн жигнэмэгийг гараараа элдэж хийдэг байж таарсан. Тэнд ажиллаж байсан хүмүүс дотроос хамгийн нимгэн, тэгш, нямбай элддэг хүн нь би болж, захиралынхаа төрсөн өдрийн бялууг бие дааж хийж байж билээ. 

Ингэж л энэ салбар луу орсон байдаг. Албан ёсоор нарийн боовны чиглэлээр ажиллаад 5 жил болж байна.  

АНХ ӨНДӨГНИЙ ШАР ЦАГААНЫГ ЯЛГАЖ АЖЛЫН ГАРААГАА ЭХЭЛЖ БАЙЛАА

 

(Докогийн урласан 7кг жинтэй, шоколадан цэцгэн чимэглэлтэй хуримын бялуу)

– Групп үүсгэх санаа хэзээ төрсөн бэ?

Свиткитчен, Урка’с китчен, Гэртээ, Баянкитчен бүлгүүдийг дагадаг, хийсэн зүйлсээ тэнд оруулдаг байлаа. Гэтэл нэг удаа “Киндер сүүн амттан” гэдэг жор оруулаад, маш их хандалт аваад. Хүмүүс ч “Пэйж, групп нээгээч” гэж зөвлөж,  2016 онд группээ нээж байлаа. 

Групптээ тараг бүрэх , кремчиз хийх, сырок, блинчик …гээд дэлгэрэнгүй жорууд оруулж, мөн ажил дээрээ хийдэг амттан, сурсан зүйлсээ, хийсэн ажлуудаа  харамгүй хуваалцдаг болсон.  Тэр хэрээр дагагчийн нөлөө нэмэгдсээр байсан.  Энэ  дашрамд тусалж дэмждэг, энэ том группуудын админууддаа баярлаж явдагаа хэлмээр байна

 

-Та бол хүнсний бүтээгдэхүүн үйлдвэрлэгч. Орост хүнсний аюулгүй байдал,  стандарт, шаардлага ямар байдаг вэ? 

-Москвад ажлын байрны аюулгүй байдал, хүнсний ариун цэвэр, тухайн ажиллаж байгаа хүний эрүүл мэнд, технологи алдахгүй хийх, хадгалах горим зөрчихгүй гээд бүх л шаардлагуудыг хатуу баримталдаг. 

Жишээ нь  би  ажлын анхны өдрөө шаардлага хангаагүй гутал, оймстой  ирсэн учраас ажиллуулаагүй. Өглөө болгон шалгадаг юм билээ. 

ХУДАЛДАН АВАГЧИД МАССААР, ХЯМД ЗАРДЛААР БҮТДЭГ БЯЛУУТАЙ ХАРЬЦУУЛААД БАЙДАГ

 

– Нарийн боов урлаг болтлоо хөгжиж байна. Манай улсад хувиараа нарийн боовны бизнес эрхлэгчид орлогоосоо илүү зардал гаргах нь их. Энэ юутай холбоотой вэ?  

-Худалдан авагчид массаар хийдэг, дэлгүүрт зардаг хямд бялуутай үнийг нь харьцуулаад байх шиг санагддаг.  Гэтэл том  үйлдвэрүүд удаан хадгалахад тэсвэртэй, өнгө үзэмжээ алддаггүй, мөн зардлаа хэмнэсэн, массаар хямд хийхэд зориулсан, транс тостой, олон төрлийн Е орсон жигнэмэг, чихэр, шоколад, торт, амттан хийдэг. 

Одоо үед хүмүүс  эрүүл мэндэд сайнгүй тийм төрлийн  хүнснээс аль болох татгалздаг болсон шүү дээ.  Натурал эко бүтээгдэхүүн, ядаж л баяраараа чанартай , тухайн хүний дуртай загварын торт амттан худалдан авах эрэлт ихэссэн учраас хүнсний үйлдвэрээс өөр түвшний гоё торт хийх зорилгоор жижиг цех бейкери, хувь хүмүүс ажилладаг гэж  ойлгодог.

 

Чанартай торт гэдэг нь зүгээр л натурал орцтой; өндөг, элсэн чихэр, гурил, цөцгий (ургамлын гаралтай сүүн крем биш), цэвэр масло (маргарин, спред биш), кремчиз, шоколад ( глазурь, candy melt биш)… гэх мэт.  Тийм тортонд удаан хадгалах гээд олон юм нэмэх шаардлагагүй. Захиалгаа хийлээ, маргааш нь хэрэглэгч авлаа.  Энэ утгаараа үйлдвэрийнхээс үнийн хувьд өндөр байдаг.  

Орост  бол массаар үйлдвэрлэдэг торт амттанаас, хувиараа хийдэг жижиг цех, кондитерууд илүү чанартай бүтээгдэхүүн ашигладаг, тухайн хүнд зориулж хийж байгаа учир дэлгүүрийн тортноос  өндөр үнэтэй байх нь асуудал биш. Хэрэглэгчид үнэ цэнийг нь ойлгодог.  Москвад дэлгүүрт 1 кг медовик 800-1000 рубль орчим бол жижиг цех бейкери болон хувиараа хийдэг кондитерт захиалахад 1кг медовик 1800 рубль ээс дээш үнэтэй байх жишээтэй. 

 

– Та бүсгүйчүүдэд сургалт ордог юм билээ. Одоогийн байдлаар нийтдээ хэдэн хүнд сургалт орсон байна?

-Тийм ээ, энийг танаар заалгая, суръя гэсэн хүсэлт маш их ирдэг, онлайн сургалтаа явуулаад 1 жил орчим болж байна. Энэ хугацаанд 2200 гаран хүмүүс хамрагдаад байна. Сургалтаараа эрүүл, натурал бүтээгдэхүүнээр чанартай амттай бүтээгдэхүүн хийж, гар доорх материалаар чимэглэх гээд  чаддаг, мэддэг бүхнээ заадаг.

 

Цаашдаа  үндсэн ажлынхаа хажуугаар сургалтаа баяжуулж   илүү олон жорууд, бүтээгдэхүүн хийх аргыг  бүсгүйчүүддээ зааж, харамгүй хуваалцсаар байх болно оо. 

(Докогийн урласан мусс бялуу)

-Ярилцсанд баярлалаа. Таны ажилд амжилт хүсье.

Бусад мэдээ

5 1 Санал
Үнэлгээ
Бүртгүүлэх
Мэдэгдэх
guest
0 Сэтгэгдэл
Inline Feedbacks
View all comments