Эрээнд ГАЦСАН 9000 чингэлэг ачааг гаалийн бүрдүүлэлтийн дарааллаар нэвтрүүлж байна
Зам, тээврийн хөгжлийн яам, Гадаад харилцааны яам болон Боомтын зөвлөл хамтран Замын-Үүд авто замын боомтын ачаа тээврийн нөхцөл байдлын талаар танилцууллаа.
Зам, тээврийн хөгжлийн яамны хэлтсийн дарга У.Гантулга “Коронавируст халдвараас шалтгаалж, авто замын хилийн боомтын үйл ажиллагааг аравдугаар сарын 13-наас зогсоосон байсан. Харин арваннэгдүгээр сарын сүүлээр чингэлэг тээврээр хийх боломжтойг БНХАУ-ын талаас мэдэгдсэн. Үүнээс хойш бэлтгэл ажлыг хангаснаар чингэлэгт тээврийг хийж эхлээд 7-8 хонож байна.
Тээвэрлэлт энэ сарын 11-нд эхэлж анх 20 гаруй чингэлэг оруулж байсан бол сүүлийн өдрүүдэд 65-69 болж өссөн.
Тээвэрлэлт зохион байгуулалтын тухайд хилийн 0 цэгээс логистикийн төв хүртэл хилийн цэргийн албаныхан тээвэрлэж, тэндээс жолооч нар тээвэрлэн Улаанбаатар хотод хүргэж байгаа.
Замын-Үүдээс Улаанбаатар хүртэл тээвэрлэлтийн үнэ 3.5 сая төгрөг болж буурсан буюу өмнө нь байсан ханшид дөхөж очсон” гэлээ.
Замын-Үүдээс Улаанбаатар хүртэл тээвэр хийхэд жолооч нарт нээлттэй аж. Харин өнөөдрийн байдлаар Замын-Үүдэд 5700 орчим тээврийн хэрэгсэл, жолооч тээвэр хийхээр хүлээж байгаа бол Эрээн талд 9000 орчим чингэлэг гацсан байдалтай байна. Үүнээс гаалийн бүрдүүлэлтийн дарааллаар 300 гаруй чингэлэг ачааг нэвтрүүлээд байна.
