“Бээжин-2022” өвлийн олимпод Монгол Улсаа төлөөлөн оролцох тамирчид мэндчилгээ ирүүлжээ

Өнөөдөр “Бээжин-2022” өвлийн олимп нээлтээ хийнэ. Олимпын наадамд эх орноо төлөөлөн уралдах цанын ОУХМ А.Энхтуул, ОУХМ Б.Ачбадрах нар Монголын ард түмэндээ зориулан сар шинийн мэндчилгээ ирүүлжээ.

ОУХМ  А.Энхтуул “Анхны олимпдоо оролцохоор ирсэн байна. Бид хоёрдугаар сарын 1-нээс энд бэлтгэлээ хийж эхэлсэн. Өнөөдөр болох нээлтийн ёслолд оролцохоор Жанжиакоу хотоос Бээжинд ирлээ.

Миний хувьд энэ онцлогтой олимпод оролцохоор ирсэнд баяртай байна. Үргэлж сэтгэлээрээ тусалж дэмжсэн Монголын иргэддээ баярлалаа. Та бүхэндээ сар шинийн мэнд хүргэе” гэжээ.

ОУХМ Б.Ачбадрах  “Монголынхоо ард түмэнд сар шинийн мэнд хүргэе. Бид хэд хоёрдугаар сарын 1-нээс өвлийн олимпын цанын зам дээр бэлтгэлээ хийж эхэлсэн. Энэ жилийн хувьд швейцар багшийн удирдлага дор бэлтгэл, сургуулилалтаа хийснээр олимпын зай төрөлд оролцох гэж байна.

Өмнөх олимпиудад 10, 15 километрт уралддаг байсан бол энэ жил 10, 15 спринт буюу 1,500 метрийн зайд оролцох гэж байна. Өнөөдөр хэдхэн цагийн дараа олимпын нээлт болох гэж байна.

Олимпын бамбар удахгүй асах гэж байгааг сэтгэл догдлон хүлээж байна. Биднийг дэмжсэн Монголын ард түмэндээ баярлалаа”.