Залуучуудын хөгжлийн хөтөлбөрийн нээлт боллоо
Холбоо мэдээлэл, технологи автоматжуулалтын цехийн “Залуучуудын хөгжлийн хөтөлбөр-2022”-ийн нээлт саяхан боллоо. Цех хэсэгтээ 0-3 жил ажиллаж буй залуу ажилтнуудын мэдлэг чадварыг дээшлүүлэх, тэдний хамт олондоо дасан зохицох чадварыг сайжруулах, хэсэг бүрийн үйл ажиллагаа уялдаа холбоог танин мэдэхэд уг хөтөлбөрийн зорилго оршиж байгаа юм.
Хөтөлбөрийн нээлтийн үеэр хэсэг бүрээс “Миний ажил-миний бахархал” сэдэвт илтгэл тавьж хэлэлцүүлэв. Түүнчлэн тус цехийн Залуучуудын хөгжлийн зөвлөл ”Эрдэнэт үйлдвэртээ баярлалаа” аян, “Олон нийтийн сүлжээний зохистой хэрэглээ” сургалт, “Чөлөөт илтгэлийн уралдаан” зарлан дүгнэх зэрэг бүтээлч ажил хийхээр төлөвлөсөн байна. Мөн цехийн хамт олон, залуучуудаа идэвхжүүлэн дэмжиж бие биеэсээ суралцан хөгжих бүх боломжийг судалж, хамтдаа алхам алхмаар хөгжих зорилт дэвшүүлжээ. Тус цехийн даргын А/109 тоот тушаалаар Залуучуудын хөгжлийн зөвлөлийг таван хүний бүрэлдэхүүнтэй байгуулсан аж. Залуучуудын хөгжлийг дэмжих хуулийн үйлчлэх хүрээнд Монгол Улсын иргэн 15-34 насны залуучуудын хөгжил, оролцоог дэмжихэд үйлчилнэ гэж заасан байдаг. Холбоо мэдээлэл, технологи автоматжуулалтын цехэд нийт 93 залуус ажиллаж байгаа нь нийт ажилтнуудын 38 хувийг эзэлж байна.
