Л.Оюун-Эрдэнэ: Мансууруулж байгаад хийсэн бичлэгийг ил болгохыг Т.Чимгээ зөвшөөрсөн

Ерөнхий сайд Л.Оюун-Эрдэнэ өнөөдөр /2021.03.08/ Хорих 401-дүгээр ангийн нөхцөл байдалтай танилцаж, С.Зориг агсны хэрэгт холбогдсон Т.Чимгээтэй уулзсан. Тэрээр уулзалтын дараа сэтгүүлчдэд мэдээлэл өглөө.

Ерөнхий сайд Л.Оюун-Эрдэнэ “Өнөөдөр Олон улсын эмэгтэйчүүдийн эрхийг хамгаалах өдөр.  Ял эдэлж байгаа хүний эрх зөрчигдсөн  асуудлаар Т.Чимгээтэй уулзлаа.ЦЕГ, ТЕГ, АТГ, ШШГЕГ гэх мэт газруудтай холбоотой асуудал юм. Зарим нь нууц бөгөөд хэрэг бүртгэлтэй холбоотой асуудал байна.  Өнөөдрийн байдлаар Т.Чимгээ 5 жил 6 сар хоригдож байгаа юм байна. Шүүн таслах процесс дунд хүний эрхийг зөрчсөн асуудал бий.

-Хорих ангид ял эдэлж буй хүн Т.Чимгээрүү зурвас бичиж дарамталсан.

-Хүний цогцос түүний гэрт аваачиж, айлган сүрдүүлсэн.

-Нүцгэн зургийг нь гэр бүлийнхэнд нь илгээсэн. Сая уулзалтаар  Т.Чимгээ  бичлэгийг ил болгох нь зөв гэж ярьлаа. Тиймээс  Засгийн газрын хуралдаанаар  хэлэлцэнэ.

– Мансууруулах бодис ашиглан, гарын хээг нь авсан байж болзошгүй.

– Төв аймагт хоригдож байх хугацаанд яллагчаар татагдсан хүмүүсийг Т.Чимгээ рүү оруулж байсан.  Хэрэгт шалгагдаж байх хугацаанд түүний охин н.Өнөрцэцэг автомашины осолд орж амиа алдсан.Энэ хэргийг дахин шалгах шаардлагатай.

 Хэрэв бид энгийн иргэнд хүчээр ял тулгасан бол яах вэ. Энэ хүний эрхэд халдсан олон зүйл болжээ. Т.Чимгээг  хэрэгт шалгагдаж байх явцад түүний төрсөн охин автомашины ослоор нас барсан.  Энэ хэргийг сэргээн шалгах нь зүйтэй гэж хүсэж байгаагаа надад хэллээ. Тиймээс ЦЕГ-т чиглэл өгч энэ асуудлыг зайлшгүй шалгана” гэлээ.