Ч.Өнөрбаяр: МАН, АН засаг барихдаа хэзээ ч төмөр сэлмээр тулалдаж байгаагүй
Ардчилсан намаас /АН/ цаг үеийн асуудлаар өнөөдөр /2022.04.06/ мэдээлэл хийж байна. АН-ын Ерөнхий нарийн бичгийн дарга Ч.Өнөрбаяр:
“Тагнуулын Ерөнхий газраас /ТЕГ/ өнөөдөр “Зохион байгуулалттай бүлэг хүмүүс хууль бус үйл ажиллагаа явуулахаар бэлтгэж байсан төдийгүй АН-ын нэр бүхий улстөрчдийн биед халдахаар бэлтгэж байсан” талаар мэдээлэл хийсэн. Дээрх асуудал дээр АН маш эмзэгээр хүлээж авсан. Тиймээс ч энэ асуудалд байр сууриа илэрхийлэх ёстой. Нэр дурдагдаад буй Б.Баасанцогт өмнө нь Монгол Улсын үе, үеийн лидер болсон улстөрчдийг шоронд суулгах схемийг зурсан байсан. Тэрхүү схемд Э.Бат-Үүл баатрын шүүхийн процесс ч мөн бий. Өнгөрсөн хугацаанд МАН, АН засаг барихдаа хэзээ ч төмөр сэлмээр хоорондоо тулалдаж байгаагүй. Харин модон сэлмээр зодолддог байсан. АН-ын үзэл санааны хоригдлуудын цуваа ч энэ асуудалтай холбоотой. Тэднийг хориод дийлэхгүй болохоор хөнөөчхөөд эрх баригч нам хөнөөчихлөө гэсэн технологи хэрэгжүүлэх гэж байсан биз. Энэ бол Монголын технологи биш” гэжээ.
Б.ЖАРГАЛ
