Афганистан улсад террорист халдлага болж 31 хүн нас баржээ

Пүрэв гарагт (2022.04.21) Афганистан улсад хэд хэдэн террорист халдлага болж олон тооны хүн бэртэж, амь насаа алдсан байна. Орон нутгийн албан тушаалтнууд болон сэтгүүлчдийн мэдээлснээр дөрвөн өөр газарт дэлбэрэлт болжээ. Анхны дэлбэрэлт Мазар И Шариф хотын сүмд болж үүний улмаас 31 хүн амь насаа алдаж, 87 хүн бэртсэн байна.

Тус халдлагыг “Islamic State” нэртэй хэт даврагч террорист бүлгэм үйлджээ. Сүм сүсэг бишрэлтнүүдээр дүүрэн байхад холын зайнаас тэсэлдэг бөмбөг ашиглан халдлага үйлдсэн гэж тус бүлгэм мэдэгдсэн байна. Афганистан улсад төр барьж буй Талибанчууд “IS” бүлгэмийг ялан дийлсэн хэмээн мэдэгдсэн ч террористууд халдлага хийсээр байгаа юм.

Эх сурвалж: BBC

Б.БУЯНДОРЖ