ГССҮТ: Могойд хатгуулсан дөрвөн хүүхэд хэвтэн эмчлүүлж байна

Энэ зун могойд хатгуулсан бага насны хүүхдийн тоо харьцангуй их байгаа талаар ГССҮТ-өөс мэдээллээ. Өнөөдрийн байдлаар тус төвд могойд хатгуулсан дөрвөн хүүхэд хэвтэн эмчлүүлж байгаа аж.

Mанай оронд дөрвөн овог, долоон төрөлд хамаарагдах есөн төрлийн могой байдаг. Тэдний дөрвөн төрөл зүйл нь хортой. Могойн хорны найрлага янз бүр учир амьд биетэд үзүүлэх нөлөө, үр дагавар нь харилцан адилгүй байдаг байна.

Могойд хатгуулсан тохиолдолд:

Хортой могойд хатгуулсан бол яаралтай эмчид хандах
Хатгуулсан хэсгийг хөдөлгөж болохгүй бөгөөд хүчтэй хөдөлгөсөн тохиолдолд бүх биеэр хор түргэн хугацаанд тархах эрсдэлтэй байдаг
Хатгуулсан газрын дээд талд чангалуур буюу ямар нэгэн зүйлээр чангалан судасны лугшилт мэдрэгдэхээр боох хэрэгтэй
Шингэн зүйл их уух
Хорны тархалтыг удаашруулахын тулд хатгуулсан хэсгийг цэвэр даавуугаар ороож боох
Хатгуулсан газрыг амаараа сорж болохгүй
Эмчийн зөвшөөрөлгүйгээр өвчин намдаах эм ууж болохгүй