Л.Энх-Амгалан: Подвалд үйл ажиллагаа явуулдаг сургууль дээд боловсрол олгож чадахгүй

БШУ-ны сайд Л.Энх-Амгалан өнгөрөгч наймдугаар сард 21 их, дээд сургуулийн сургалтын үйл ажиллагааг зогсоож байгаа талаар мэдэгдсэн.

Энэ талаар тэрбээр, “21 их, дээд сургуулийн үйл ажиллагааг зогсоосон асуудал бол гэнэтийн шийдвэр байгаагүй. Сүүлийн нэг жил хийгдэж байгаа боловсролын салбарын шинэчлэл бол өнгөрсөн жилүүдэд дутуу хийгдсэн ажлын үргэлжлэл. Түүнээс биш би гэнэт гарч ирээд улстөрийн ашиг хонжоо хайж, гэнэтийн шийдвэр гаргаагүй. Нийгэмд ямар хүмүүс бэлтгэх хэрэгцээ шаардлага байна вэ гэдгийг бүгдээрээ мэдэж байгаа. Улсын сургуулиуд нь сайн, хувийнх нь тааруу гэдэг байдлаар ерөөсөө хандаж болохгүй. Их дээд боловсрол дээр төр, хувийн сургуулиуд адилхан ачаалал үүрэх ёстой.

Өнөөдрийн байдлаар хүн амтайгаа харьцуулахад 100 гаруй их дээд сургуультай улс орон ховор. Подвалд үйл ажиллагаа явуулдаг, 47-хон оюутантай сургууль Монгол Улсад байж болох уу. Энийг би дээд боловсрол гэж ерөөсөө ойлгохгүй байна.

Үүний цаана татварын хулгай дээрэм явж байгаа. Их дээд сургуулийн статусаар бүртгүүлчхээд боловсрол, их дээд сургууль гэдэг гэдэг үндсэн чиг үүргээ орхиод, олон мянган га газрыг өөр дээрээ шилжүүлж, өөр бизнес явуулж татвараас бултаж байгаа ийм л асуудал шүү дээ” гэв.