Энэ сард 36 сумын 110 цэцэрлэг, сургууль, дотуур байрны нүхэн жорлонг солино

Аравдугаар сард 11 аймгийн 36 сумын 110 цэцэрлэг, сургууль, дотуур байрын ариун цэврийн байгууламжийг байнгын ашиглалтад оруулахаар болжээ.

Тодруулбал, улсын хэмжээнд төрийн өмчийн цэцэрлэг, ерөнхий боловсролын сургууль, дотуур байрын нүхэн жорлонг орчин үеийн ариун цэврийн байгууламжаар солих төслийг “Эрдэнэт” үйлдвэрийн санхүүжилтээр Боловсрол шинжлэх ухааны яам, Барилга, хот байгуулалтын яам, Байгаль орчин, аялал жуулчлалын яам хамтран дөрвөн үе шаттайгаар хэрэгжүүлэхээр төлөвлөн 2021 оноос эхлүүлсэн.

2022 оны болон есдүгээр сарын байдлаар эхний I, II ээлжээс таван аймгийн 11 сумын 24 объектод Улсын комисс ажиллаж, ашиглалтад хүлээн аваад байгаа аж.

Харин аравдугаар сард 11 аймгийн 36 сумын 110 цэцэрлэг, сургууль, дотуур байрын ариун цэврийн байгууламжийг байнгын ашиглалтад оруулахаар Улсын комисс ажиллуулах хүсэлтийг Барилгын хөгжлийн төв ТӨААТҮГ, аймгийн Газрын харилцаа, барилга хот байгуулалтын газарт хүргүүлжээ.

Үүнд:

• Баян-Өлгий аймгийн Бугат, Булган, Буянт, Сагсай суманд 10 объект
• Увс аймгийн Зүүнговь, Хяргас, Цагаанхайрхан суманд 11 объект
• Ховд аймгийн Дуут, Булган, Алтай, Үенч суманд 15 объект
• Завхан аймгийн Асгат, Баянтэс, Тэс, Түдэвтэй, Цагаанхайрхан, Дөрвөлжин, Баянхайрхан, Отгон, Ургамал, Яруу, Нөмрөг, Сонгино суманд 40 объект
• Говь-Алтай аймгийн Жаргалан суманд 1 объект
• Баянхонгор аймгийн Баянбулаг, Заг суманд 4 объект
• Булган аймгийн Гурванбулаг, Могод, Хангал, Баяннуур суманд 12 объект
• Архангай аймгийн Хангай суманд 3 объект
• Төв аймгийн Жаргалант, Сэргэлэн суманд 5 объект
• Дундговь аймгийн Эрдэнэдалай, Цагаандэлгэр суманд 6 объект
• Дорноговь аймгийн Улаанбадрах суманд 3 объект багтаж байгаа талаар Боловсрол, шинжлэх ухааны яамнаас мэдээллээ.