“Түлэгдсэн хүүхдэд минь туслаач” хэмээн бусдаас 3,567,000 төгрөг залилсан этгээдэд ял оноожээ

Иргэн Б нь фейсбүүкт “…Гэмтлийн эмнэлгийн түлэнхийн нөхөн сэргээх мэс заслын тасагт миний хүү Т, А нар нь шокийн байдалтай хэвтэн эмчлүүлж байна. Нэг өдрийн эмчилгээний зардалд 150.000–200.000 төгрөг зарцуулж байгаа тул бидэнд туслаач…” гэсэн хуурамч нийтлэл оруулж, 2021 оны 8 дугаар сараас 2022 оны нэгдүгээр сар хүртэл хугацаанд 291 иргэнийг хуурч нийт 3,567,000 төгрөг цуглуулжээ.

Гэмтэл Согог судлалын үндэсний төвийн түлэнхийн нөхөн сэргээх тасгийн зохих албан тушаалтнууд энэхүү хуурамч нийтлэлийн талаар Цагдаагийн байгууллагад мэдэгдсэнээр тус гэмт үйлдэл таслан зогсоогдож, прокуророос иргэн Батыг “залилах” гэмт хэрэгт холбогдуулан яллах дүгнэлт үйлдэн шүүхэд ирүүлсэн байна.

Баянгол дүүргийн Эрүүгийн хэргийн анхан шатны шүүхээс шүүгдэгч Батыг амар хялбар аргаар мөнгө олох зорилгоор “иргэдийн бусдад туслах гэсэн өрөвч сэтгэлийг ашиглан хохирлыг учруулсан” залилах гэмт хэрэг үйлдсэн гэм буруутайд тооцож, 700 цаг нийтэд тустай ажил хийлгэх ялаар шийтгэсэн байна.

Бат энэхүү ялыг биелүүлээгүй тохиолдолд нийтэд тустай ажил хийлгэх ялын найман цагийн ажлыг нэг хоногоор тооцож хорих ялаар солихыг шүүгдэгчид сануулсан байна.