Д.Амарбаясгалан: Засгийн газар жагсагчдын шаардлагатай санал нэг байна

ЗГХЭГ-ын дарга Д.Амарбаясгалан, Эдийн засгийн хөгжлийн сайд Ч.Хүрэлбаатар нар өнөөдөр /2022.12.05/ цаг үеийн асуудлаар мэдээлэл хийсэн билээ.

Энэ үеэр МАН-ын Ерөнхий нарийн бичгийн дарга, ЗГХЭГ-ын дарга Д.Амарбаясгалан “Өнөөдөр Монгол Улсын иргэд төр засагтаа тодорхой шаардлагыг тавьж, жагсаал цуглаан зохион байгуулж байна. Хэдий иргэд өөрсдийнхөө үзэл бодлыг илэрхийлж, нийгэмд үүсээд байгаа олон асуудалд бухимдлаа илэрхийлж Засгийн газар болон УИХ-ыг асуудлыг шийдвэрлэхийг шаардаж байгаатай Засгийн газрын зүгээс санал нэг байна. Ер нь, сүүлийн жилүүдэд олон нийтэд ил болж байгаа томоохон бүлэглэлийн зохион байгуулалттай хулгай, дээрмийн үйл ажиллагаатай холбоотой асуудлыг ил гаргаж, ил тод болгосон. Үүний  үр дүнг нэхсэн ард иргэдийн жагсаал цуглаан болж байна гэж ойлгож байна. Нөгөө талаар энэ асуудлуудыг түргэн, шуурхай шийдвэрлэх чиглэл дээр хууль хяналтын байгууллагад хандаж байгаа гэдгийг хэлэх байна” хэмээн тодотгосон билээ.

Түүнчлэн “Засгийн газрын зүгээс жагсагчдын тавьж байгаа шаардлагыг хүлээж авч ажиллана. Нөгөө талаар олон нийтийн жагсаал, цуглааныг өөр чиглэл зорилгоор ашиглах үймээн самуун дэгдээх оролдлого хийх аюул байдаг. Тиймээс зохион байгуулж байгаа хүмүүст хандаж хэлэхэд аливаа асуудлыг яриа, хэлэлцээрээр шийдэх ёстой. Тиймээс Засгийн газраас Ажлын хэсэг гаргасан” гэсэн юм.