META-ын Монгол дахь төлөөлөгчийн газраас Жорж Ченийн жиргээтэй холбоотой асуудлаар залруулга гаргажээ

ХЗДХ-ийн сайд Х.Нямбаатарын “Мета компанийн Төв Ази, Монгол, Хятадыг хариуцсан захирал ноён Жорж Чен нар уулзсан эсэх, хуулийн төсөл дээр хамтарч ажиллах талаар ярилцсан эсэх нь үнэн, худал гэсэн маргаан цахим орчинд түгсэн. Дээрх асуудлаар  “Мета”-ын Монгол дахь төлөөлөгч А.Бямбажаргал цахим хуудаснаа дараах залруулгыг нийтэлжээ.

Тэрээр “ХЗДХЯ-тэй өнгөрсөн жил Meta компанийн төлөөлөл болон миний бие уулзсан. Дээрх tweet-н дагуу хамтран ажиллах талаар ярилцсан ба яг ажил хэрэг болж эхлээгүй байсан. Би тэр үеийн хуучин хуулийн драфтийг аваад орчуулганд өгсөн ба Meta-д өгөөгүй байсан. Харин Жеорж Чэн-ы tweet-н хариулт нь шинээр батлагдсан ЦХХХЯ-н хуулийн тухай ярьж байгаа ба, Meta-н зүгээс энэ хуулийн хувьд ямар нэгэн оролцоо байхгүй гэж хэлж байгаа юм.

Сайдыг худалч гэж дуудаагүй гэдгийг тодотгох хэрэгтэй байх. Мэдээж бид үргэлж хүний үзэл бодлоо илэрхийлэх эрхийг дээдлэн ажиллах ба шинэ хуулийг Англи хэл дээр хүлээн авч манай хуулийн багийнхан судалж эхэлсэн байгаа” гэжээ.

Түүнчлэн энэ талаар  ХЗДХЯ-ны Төрийн нарийн бичгийн дарга П.Сайнзориг  “Манай улсад ажиллаж буй төлөөлөгч гэх бүсгүй рүү хоёр  ч удаа и-мэйлээр хүргүүлсэн байдаг тохиролцсоны дагуу. Андуурсан юм болов уу даа” гэсэн байв.

Ямартай ч уг уулзалтаар энэ яриа хэлэлцээр болсон бөгөөд “Мета”-ын төлөөлөгч хуулийн төслийг орчуулж байсан хэдий ч төв байгууллага руугаа явуулж амжаагүй гэж ойлгогдохоор байна.