#ТОДРУУЛГА Б. Тэмүүжин: “Миний дүү хоол идсэний дараа шалаа угаачих” гэтэл “Гоймонгоо дуугүй гудар” гэсэн

CU сүлжээ дэлгүүрийн 7 буудал дахь салбарын ажилтан үйлчлүүлэгчтэй зүй бус харилцаж байгаа бичлэг цахим ертөнцөд түгсэн. Бид үүнтэй холбогдуулсан тус салбараар үйлчлүүлсэн буюу бичлэг тавьсан иргэн Б.Тэмүүжинтэй холбогдож тодруулга авлаа.

“Энэ үйл явдал уржигдар орой /2023.03.22/ 11:30 минутын үед болсон. Би хувиараа бизнес эрхэлдэг. Орой ажлаасаа буугаад, хөнгөн хооллох гээд гоймон аваад идэж байсан. Гоймонгоо идэж байхад ажилтан залуу шал арчаад байсан учир “Миний дүү ахыгаа хоол идээд дуусахаар шалаа арччих” гэтэл “Дуугүй наад гоймонгоо гудар” гэж хэлсэн. Тэгэхээр нь би “Энэ үйлчилгээний газар. Миний дүү хүнтэй ингэж харьцаж болохгүй шүү. Түргэн ууртай хүн таарвал яаана” гээд аль болох эвзүйтэй харьцсан. Ингээд касс дээр сууж байсан хүүд хэлтэл манайд ажилладаггүй хүн гэж хэлсэн. Тэр хүүг би хараагаагүй. Гэтэл 4-5 залуу өөдөөс харааж эхэлсэн. Ямар ч хяналтгүй, олон залуус тэнд гар утсаа оролдоод, гэртээ байгаа мэт л замбараагүй байсан. Би архи уудаггүй хүн. Ижилхэн насны хүүхэдтэй учир би хүлээцтэй хандсан. Энэ үйл явдлыг баримтжуулж, удирдлагууд нь хараад ажилчиддаа зөв шаардлага тавиасай л гэж хүссэн. Бичлэгт ажилтан нь биш гэж хэлж байгаа ч, мөн байсан юм билээ. Энэ үйл явдлын дараа CU-ын 7 буудал хариуцсан салбарын менежер над руу ярьсан. Камерын бичлэгээ шүүж үзлээ. Манай ажилтны буруу, та зөв шаардлага тавьсан байна. Бидний буруу байжээ гээд уучлалт гуйсан. 360 гаруй салбартай сүлжээ дэлгүүр бол хаана ч байсан ижил стандарттай байх ёстой. Их дэлгүүрийн CU, 7 буудлын CU адилхан стандарт үйлчилгээтэй байх ёстой гэж бодож байна” гэв.