ХЭРГИЙН МӨРӨӨР: Шоронгоос суллагдаад удаагүй этгээд найзынхаа 7 настай дүүг хүчирхийлж, хөнөөжээ
Баянгол дүүрэг, “Зүүн наран”-гийн гэр хорооллын нам гүм гудамж. Жирийн өдрүүдэд хүүхдийн инээд цалгиж, хүний хөл тасардаггүй гудамд харин өнөөдөр л нам гүм огшооно. Хүүхэд, хөгшид гэрийнхээ салхивчаар л агаарыг мэдрэхээс өөрөөр гадна гарахаас зүрхшээсэн нь илт. Учир нь энэ л гудамжинд эгч дүүстэйгээ эрүүл саруул, тоглож наадан гүйсэн бяцхан охин балмад этгээдийн гарт алтан амиа зэрлэгээр хөнөөлгөсөн юм. Гэрийн гадна хэсэг томчуул хэлэх үг, байх суух газраа олж ядан бачимдана. Зам дагуух хашааг тойроод олон машин эгнэж зогссоноос өөрөөр гудамжинд холхих хүн бараг үгүй. Бяцхан охины ээж санаашран “Миний жаахан охиныг яах нь энэ вэ” хэмээн санаа алдан мэгшин суугааг харах даанч харуусмаар.
Охины цогцсыг гэрийнх нь хаяанаас 100 метр хүрэхгүй ойр байрлах эзэнгүйдсэн, балгас болсон хашааны жорлонгоос олжээ. Ойролцоох айлын хөрш хэрэг болсон өдөр буюу тавдугаар сарын 28-ны өдрийн өглөө 10:00 цагийн үед анх охины цогцсыг олсон гэх. Таних хувцасгүй, чармай нүцгэн байсан учир эх нь охиныхоо задгайлсан урт гэзэг, биеэр нь л таньжээ. Цогцсыг гаргасны дараа тухайн жорлонг нурааж, банзаар нь бохир нүхийг таглан орхисон байна. Үзлэг явуулсан гэмээр хэрэглээд орхисон цагаан эмнэлгийн бээлий хажууд нь харагдана. Охины ажил явдалд ирсэн зочид “Ахынх нь найз юм гэсэн шүү дээ. Арай ч дээ. Санаанд багтаж өгөхгүй юм” хэмээн санаа алдана. Тухайн гудамжид нам гүм ноёлох ч, дэлгүүр хоршоо зэргэлдээх хөршүүд хэдийн эл цочирдом хэргийн тухай сонсож, шивэр авир ярилцана. Ингэхдээ хүү, охин руугаа утас цохиж, гэрээс гаргахгүй шүү хэмээн ярих нь балмад этгээд ойр хавьд байж мэднэ хэмээн сэрэмжилж буй нь илт.
Эл цочирдом хэргийн тухай цагдаагийн байгууллагаас дараах мэдээллийг өгөөд буй.
“Манай 00-д 5,6 орчим насны нүцгэн, бололтой хүүхэд алаад хийчихсэн байна” гэсэн мэдээлэл 05-р сарын 28-ны өдөр цагдаагийн байгууллагад бүртгэгдсэн. Дуудлага, мэдээллийн дагуу шалгахад 7 настай эмэгтэй хүүхдийг 21 настай эрэгтэй хүчирхийлж, улмаар амь насыг нь хохироогоод айлын жорлонд хийж, хэргийн газрыг орхин зугтаасныг цагдаагийн байгууллагаас шуурхай эрэн сурвалжилж, тухайн этгээдийг баривчлан цагдан хорьж, шалгалтын ажиллагааг явуулж байна. Хуулийн зохицуулалтын хувьд ЭХ-ийн 12.1.4 буюу бүх насаар нь хорих санкцтай байдаг" хэмээгээд буй.
Охиныг хүчирхийлсэн 22 настай А гэгч нь охины ахын найз гэх бөгөөд бусдыг дээрэмдэх гэмт хэргээр ял эдэлж, шоронгоос суллагдаад удаагүй байжээ. Улмаар найзындаа зочилж ирэхдээ эл балмад хэргийг үйлдээд зугтсаныг цагдаагийн байгууллагаас шуурхайлан баривчилжээ. Талийгаач охины амьдардаг гэр орчмын дэлгүүр, худалдааны төвүүдийн хяналтын бичлэгийг авсан байна. Талийгаач охин бага насны дөрвөн дүүтэйгээ, аав ээжтэйгээ амьдардаг байсан тухай эх сурвалж хэллээ.
Өдгөө хэргийн мөрдөн шалгах ажиллагаа үргэлжилж буй бөгөөд харин охины гэрийнхэн талийгчаа үдэхээр бэлтгэлээ хийж байв. Ээж аавдаа эрхэлж гүйсэн бяцхан охин балмад этгээдийн гарт амиа алдаж, харин гэмт этгээд улсын шоронд үнэгүй будаа идээд өдөр хоногийг өнгөрүүлнэ гэдэг даанч харуусмаар… Энэ нийгэмд хүүхэд нялхас эрүүл аюулгүй амьдрах баталгаа алдагдсан нь энэ мэт сэтгэл сэртхийлгэм хэргүүд харуулна.
БАГА НАСНЫ ХҮҮХЭД ХҮЧИРХИЙЛЖ, УЛМААР АМЬ ХОХИРСОН БОЛ 12-20 жил эсхүл бүх насаар хорих ялаар шийтгэнэ
12.1 дүгээр зүйл. Хүчиндэх
1.Хохирогчийн хүсэл зоригийн эсрэг хүч хэрэглэж, хүч хэрэглэхээр заналхийлж, эсхүл сэтгэцийн өвчтэй, согтуурсан, мансуурсан, сэтгэцийн үйл ажиллагаа нь түр сарнисан, бусад өвчний улмаас биеэ хамгаалах, эсэргүүцэл үзүүлэх чадваргүй, эсхүл эд хөрөнгө, албан тушаал, бусад нөхцөл байдлын улмаас эрхшээлдээ байгааг далимдуулан хүчээр бэлгийн харьцаанд орсон, эсхүл бэлгийн харьцааны шинжтэй хүч хэрэглэсэн үйлдэл хийсэн бол нэг жилээс таван жил хүртэл хугацаагаар хорих ял шийтгэнэ.
2.Энэ гэмт хэргийг:
2.1.арван дөрвөөс дээш арван найман насанд хүрээгүй хүнийг хүчиндэж;
/Энэ заалтад 2017 оны 5 дугаар сарын 11-ний өдрийн хуулиар өөрчлөлт оруулсан/
2.2.бүлэглэж;
2.3.гэр бүлийн хамаарал бүхий харилцаатай хүнийг хүчиндэж;
2.4.хохирогчийг жирэмсэн болгож;
2.5.хохирогчид бэлгийн замын халдварт өвчин халдааж;
2.6.хоёр, түүнээс олон хүнийг хүчиндэж;
2.7.урьд нь энэ бүлэгт заасан гэмт хэргийг үйлдэж гэм буруутайд тооцогдож байсан хүн;
2.8.харгис хэрцгий аргаар;
2.9.бие махбодын, сэтгэл санааны шаналал, зовиур үүсгэж;
/Энэ заалтыг 2017 оны 5 дугаар сарын 11-ний өдрийн хуулиар хүчингүй болсонд тооцсон/
2.10.хохирогчийг тохуурхан доромжилж үйлдсэн бол таван жилээс арван хоёр жил хүртэл хугацаагаар хорих ял шийтгэнэ.
/Энэ заалтад 2020 оны 01 дүгээр сарын 10-ны өдрийн хуулиар өөрчлөлт оруулсан./
3.Энэ гэмт хэргийн улмаас ураг зулбасан, эсхүл арван зургаан насанд хүрээгүй хүнийг жирэмсэн болгосон; гэр бүлийн хамаарал бүхий арван зургаан насанд хүрээгүй хүнийг хүчиндсэн бол найман жилээс арван таван жил хүртэл хугацаагаар хорих ял шийтгэнэ.
/Энэ хэсэгт 2020 оны 01 дүгээр сарын 10-ны өдрийн хуулиар өөрчлөлт оруулсан./
4.Энэ гэмт хэргийг бага насны хүүхдийн эсрэг үйлдсэн; энэ гэмт хэргийн улмаас хохирогч нас барсан бол арван хоёр жилээс хорин жил хүртэл хугацаагаар, эсхүл бүх насаар хорих ял шийтгэнэ.
Тайлбар: -Хүчиндэх гэмт хэргийн хохирогч нь бэлгийн халдашгүй байдал нь зөрчигдсөн аль ч хүйсийн хүн байж болно.
-Бага насны хүүхдийн эсрэг энэ гэмт хэргийг үйлдсэнд тооцоход энэ зүйлийн 1 дэх хэсэгт заасан аргаар үйлдсэн байхыг шаардахгүй.
-“Бэлгийн харьцааны шинжтэй хүч хэрэглэсэн үйлдэл” гэж хохирогчийн биеийн аль нэг хэсэгт бэлэг эрхтнээ оруулсан; хохирогчийн бэлэг эрхтэнд өөрийн бусад эрхтэн, эсхүл өөр зүйл оруулсныг ойлгоно.
ВИДЕО ҮЗЭХ:
