"Гацуурт" ХХК-ийн захирал Л.Чинбаттай холбоотой асуудалд Улсын харцага Ө.Даваабаатараас тайлбар авна

“Гацуурт” ХХК-ийн захирал, Хөдөлмөрийн баатар Л.Чинбат Сэлэнгэ аймгийн Зүүнбүрэн сумын малчдыг машинаараа хөөж, дайрч унагааж байгаа бичлэг цацагдсан. Энэ талаар ЦЕГ-аас дараах мэдээллийг өгөөд буй.

“2023 оны зургадугаар сарын 15-ны өдөр 13:20 минутанд “Гарал үүслийн бичиггүй адуу оруулах гээд байна, оруулахгүй гэхэд манай ажилчдыг дайрна гээд хөөгөөд байна гэх” дуудлага, мэдээллийн дагуу Сэлэнгэ аймгийн Зүүнбүрэн сумын хоёрдугаар багт аймгийн төвөөс тус сум руу Цагдаагийн газрын бүрэлдэхүүн ажиллахаар явсан байна. Хойшлуулшгүй ажиллагаа дуусаагүй байна” гэв.

Харин тэрбээр энэ тухай цахим хаягтаа “Манай адууг туугаад явж байгаа малын хулгайч нартай тэмцэж байна. Цаашдаа ч тэмцэнэ. Малын хулгай, хулгайч нар хэрээс хэтэрлээ. Хууль хяналтын байгууллагад гомдлоо гаргасан” гэж бичжээ.

Тэгвэл эл асуудалд Улсын харцага Ө.Даваабаатарыг эрэн сурвалжилж олж тайлбар авсны дараа “Гацуурт” ХХК-ийн захирал Л. Чинбаттай холбоотой эл хэрэгт хэрэг бүртгэлтийн хэрэг нээх, эсэх нь шийдэгдэх аж.

Учир нь Улсын харцага Ө.Даваабаатар Дорнод, Сүхбаатараас 300 гаруй адууг гарал үүслийн гэрчилгээгүй олон пост давуулж оруулж ирсэн байна. Тэрбээр утсаа салгаж, хаана байгаа нь тодорхой бус байгаа учир эрэн сурвалжлах ажиллагааг зохион байгуулах аж.