Татварын боловсролыг багаас нь олгоно

Татварын ерөнхий газрын дарга Б.Заяабал Боловсролын судалгааны үндэсний хүрээлэнгийн багш, эрдэмтэн судлаачидтай уулзлаа. Уулзалтын эхэнд Татварын ерөнхий газрын дарга Б.Заяабал бүх нийтийн татварын боловсролд анхаарах нь улс орны төсвийн орлого тасралтгүй байх, татварын хууль тогтоомжийг хэрэгжүүлэхэд дөхөм болох, татвар төлөгчид хуулиа хэрэгжүүлэхэд ойлгомжтой хялбар болох зэрэг олон талын ач холбогдолтойг онцоллоо.

Боловсролын судалгааны үндэсний хүрээлэнгийн захирал М.Итгэл ЕБС-ийн  2024 оноос хэрэгжиж эхлэх сургалтын хөтөлбөрт оруулах саналаа ирүүлэхийг бусад төрийн байгууллагууддаа уриалан ажиллаж байна. Татварын ерөнхий газрын зүгээс идэвхи санаачлагатай хамтран ажиллаж байгаад талархалаа илэрхийллээ.

Татварын ерөнхий газраас олон нийтийн татварын боловсролыг дээшүүлэх хөтөлбөр хэрэгжүүлж байна. Энэхүү хөтөлбөрийн хүрээнд 2024 оноос хэрэгжих ЕБС-ийн сургалтын хөтөлбөрийн агуулгад татварын мэдлэг мэдээллийг тусгах, дан ганц нийгэм, эдийн засгийн хичээлийн агуулгаар бус бусад хичээлийн агуулгад шингээн, хэрэглэгдэхүйц, амьдралд ойр байлгахад анхаарч байна.

Нөгөө талаас Боловсролын судалгааны үндэсний хүрээлэн ЕБС-ийн хичээлийн хөтөлбөрийн шинэчлэлийг хийхдээ бусад төрийн байгууллагуудтайгаа хамтран ажиллаж, салбар салбарын боловсролын мэдээллийг тусгахад анхаарч байгаа аж. Үүний хүрээнд өнөөдрийн уулзалт болсноороо ач холбогдолтой байлаа. Цаашид хоёр тал хамтын ажиллагаагаа эрчимжүүлж, ерөнхий боловсролын сургуулийн сургалтын хөтөлбөрөөр дамжуулан хүүхэд багачуудад татварын боловсрол олгоход хамтарч ажиллахаар боллоо.