М.Бадарчийн барилдах эрхийг 4 жилээр хасах санал хүргүүлжээ

Үндэсний их баяр наадмын Бөхийн салбар хороо өчигдөр хуралдаж Улсын арслан М.Бадарчийн барилдах эрхийг 4 жилээр хасах санал гаргажээ. Улмаар баяр наадмыг зохион байгуулах хороонд уг саналаа хүргүүлжээ.

Энэ жилийн баяр наадмын Хүчит бөхийн барилдаанд улсын гарди М.Бадарч түрүүлж, улсын арслан цол хүртсэн. Гэвч түүний сорьцоос метенолон гэх бүх цаг үед хориотой допингийн төрлийн бодис илэрсэн тул тэрээр В сорьцоо шинжлүүлэх хүсэлт өгч, өөрийн биеэр хяналт тавихаар БНСУ явсан ч  В сорьцын хариу албан ёсоор гарч, допинг хэрэглэсэн нь баталгаажсан юм.