ЧУУЛГАН: 2024 оны төсвийн төслийн хоёр дахь хэлэлцүүлгийг хийнэ

Өнөөдөр УИХ-ын хоёр Байнгын хороо хуралдаж, энэ долоо хоногт чуулганы хуралдаанаар хэлэлцэх асуудлуудад санал дүгнэлтээ гаргана. Тухайлбал, Байгаль орчин, хүнс, хөдөө аж ахуйн байнгын хорооны хуралдаанаар Мал, амьтны эрүүл мэндийн тухай хуульд нэмэлт, өөрчлөлт оруулах тухай, Амьтан, ургамал, тэдгээрийн гаралтай түүхий эд, бүтээгдэхүүнийг улсын хилээр нэвтрүүлэх үеийн хорио цээрийн хяналт, шалгалтын тухай хуулийн нэмэлт, өөрчлөлт,  Гэрийн тэжээвэр амьтны тухай хуулийн төслийг хэлэлцэх юм.

Мөн Эдийн засгийн байнгын хорооны хурлаар Засгийн газрын тусгай сангийн тухай хуулийн хэрэгжилтийг хянан шалгах, эдгээр сангуудад байршиж байгаа мөнгөн хөрөнгийн төвлөрүүлэлт, зарцуулалт, эрсдэлээс хамгаалах талаар санал, дүгнэлт гаргах үүрэг бүхий ажлын хэсгийн санал, дүгнэлтийг хэлэлцэнэ.

Түүнчлэн өнөөдөр УИХ-ын чуулган хуралдаж, 2024 оны төсвийн төслийн хоёр дахь хэлэлцүүлгийг хийнэ.