Алга болсон иргэний цогцсыг уулын бэлээс олжээ

Хан-Уул дүүргийн 14 дүгээр хороо, Өлзийтийн гудамжаас иргэн С нь шөнө дунд гэрээсээ гараад алга болсон тухай дуудлага мэдээлэл өчигдөр өдрийн 15:10 цагт ОБГ-т ирсэн байна.

Нийслэлийн Аврах ангийн алба хаагчид 25 км замыг туулан 16:09 цагт очиж иргэн С/38 настай, эрэгтэй, хөгжлийн бэрхшээлтэй, согтууруулах ундаа хэрэглэсэн/-г 16:15 цагаас эхлэн эрэн хайх ажиллагааг зохион байгуулан ажиллаж мөн өдрийн 16:44 цагт гэрээс нь зүүн зүгт нэг км зайд тус дүүргийн 14 дүгээр хороо, “Бугын-Ам” гэдэг газраас уулын бэлд цасанд дарагдсан байдалтай цогцсыг олж тус дүүргийн Цагдаагийн хоёрдугаар хэлтэст хүлээлгэн өгчээ.

Иймд хүйтний эрч эрс чангарч буй тул иргэд та бүхэн үүсэж болзошгүй аюулаас урьдчилан сэргийлж, архи согтууруулах ундааны зүйл хэрэглэсэн үедээ осгохоос сэргийлнэ үү.