ТООЦООЛОЛ: Хатуу хөл хориог сунгавал 150 орчим хүний амь нас эрсдэхээс сэргийлнэ

Засгийн газрын хуралдаанаар энэ сарын10-наас 25-ныг хүртэл улаан түвшинд шилжих шийдвэр гаргаж хөл хорио тогтоосон билээ.

Гэвч ХӨСҮТ-өөс хатуу хөл хориог 28 хоногийн хугацаатай тогтоож байж халдварын тархалтын гинжин хэлхээг тасалж чадах ба үр дүнд хүрнэ гэж мэдээлж байгаа. Мөн Эрүүл мэндийн яам хатуу хөл хорионы дэглэмийг 7-14 хоног сунгах саналаа УОК-т хүргүүлсэн.

Тэгвэл МУИС-ийн судлаачид өнөөгийн халдварын бодит нөхцөл байдлаар шинэчилсэн бас нэгэн тооцооллыг гаргасан байна.

Тодруулбал, Хэрэв энэ удаагийн “Бүх нийтийн бэлэн байдлын зэрэг”-ийг 7 хоног сунгавал дөрөвдүгээр сарын 25-наар хөл хориог цуцалсантай харьцуулахад нийт халдвар авч батлагдсан хүний тоо есдүгээр сарын 1-н гэхэд ойролцоогоор 70,000 болж, нэмж 20-30 орчим мянган хүн халдвар авахаас сэргийлэх бөгөөд нас баралт одоогийн хурдаар 250-300 хооронд хэлбэлзэж, 100 орчим хүний амь нас аварна гэж тооцоолсон байна.

Хэрэв дахин 7 буюу нийт 14 хоног сунгавал халдвар авч батлагдсан нийт хүний тоо есдүгээр сарын 1-н гэхэд ойролцоогоор 60,000 болж, нэмж 30,000 орчим хүн халдвар авахаас сэргийлэх бөгөөд 150 орчим хүний амь нас эрсдэхээс сэргийлэх боломжтой гэсэн тооцоо гаргажээ.