Замын-Үүд, Хавирга, Бичигт, Шивээхүрэн боомтоор суудлын автомашинаараа зорчдог боллоо

Монгол улсын Замын-Үүд, Хавирга, Бичигт, Шивээхүрэн хилийн боомтуудаар 8-аас доош суудалтай, хувийн автомашинаараа хил нэвтрэх боломжтой болжээ.

Тодруулбал, Монгол, Хятадын хилийн Хавирга-Ар хашаат боомтоор 8-аас доош хүний суудалтай, автомашиныг энэ сарын 14-нөөс, Бичигт-Зүүнхатавч боомтоор 21-нээс нэвтрүүлдэг болсон байна.

Ингэхдээ эхний ээлжид тухайн хил орчмын бүс нутагт амьдарч байгаа иргэд өөрсдийн хувийн тээврийн хэрэгслээрээ нэвтрэх боломжтойг ЗТХЯ-наас мэдээлсэн.

Цаашид БНХАУ-ын Шинжаан-Уйгарын өөртөө засах орны Өрөмчтэй хиллэж байгаа хилийн боомтуудаар 8-аас доош хүний суудалтай автомашиныг нэвтрүүлэх асуудлыг шийдвэрлэхээр хэлэлцэж байгаа аж.

Замын-Үүд хилийн боомтоор хоёр талын холбогдох байгууллагууд мэдээлэл солилцож, 1,100 орчим тээврийн хэрэгслээр иргэд хил хооронд зорчжээ.