АТГ-аас өнөөдөр УИХ-ын гишүүн асан Ц.Гарамжавыг хойшлуулшгүйгээр 48 цагийн хугацаатай баривчилсан байна. Одоогоор түүнийг ямар үндэслэлээр баривчилсан талаар мэдээллийг өгөх боломжгүй байна гэж эх сурвалж мэдээллээ.
АТГ-аас түүнийг шалгаад үргэлжлүүлэн хорих үндэслэлтэй гэж үзвэл прокурорт саналаа хүргүүлснээр шүүх цагдан хорих эсэхийг шийдэх юм. Хууль хүчний байгууллагууд аливаа этгээдийг шүүхийн шийдвэргүйгээр 48 цаг саатуулах боломжтой.
Баривчилгааны талаар Ц.Гарамжавын охин Н.Мөнхнасан дараах байр суурийг илэрхийлжээ.
Тэрээр “Улс орондоо аж үйлдвэржилтийн төслийг хөгжүүлэх зорилго дор нэгдэж анхны цементийн үйлдвэрийн төслийг бид олон улсаас мөнгө босгон эхлүүлсэн байдаг. Нийт санхүүжилтийн 20% Хөгжлийн банкнаас нээлттэй ил тод олон шалгуураар дамжиж авсан ба 126.6 тэрбум төгрөг авснаас нийт 260.2 тэрбум төгрөгийн эргэн төлөлтийг хийж бүрэн хаасан. Уг зээлийн эргэн төлөлтийг авсан даруй буюу 2015 оны 01 сараас эхлэн 100 гаруй тэрбум төгрөгийн ханшийн алдагдлын хамт 40 гаруй удаагийн эргэн төлөлтөөр бүрэн төлж дууссан. Төсөл нь ч 100% амжилттай хэрэгжиж улс орны бүтээн байгуулалт, барилгын салбарт чухал нөлөө үзүүлж олон мянган ажлын байр алслагдсан хөдөө орон нутгийн хөгжилд хувь нэмрээ оруулсан. 2014 онд миний ээж албан тушаалтан байгаагүй ба, албан тушаал урвуулан ашигласан, зориулалтын бус зарцуулсан гэх мэт гэмт хэрэгт удаа дараа зохион байгуулалттай сэрдэгдэж байгаа нь хүний эрхээс хэтэрсэн зүйл болж байна!” гэжээ.
