”RAP Devjee”-ний үеэр ёс зүйгүй авирласан жүдоч Ж.Энхтөрийн барилдах эрхийг 6 сараар хасжээ
”RAP Devjee” нэвтрүүлгийн шинэ жилийн баярын дугаарын үеэр жүдо бөхийн тамирчин Ж.Энхтөрийн гаргасан ёс зүйгүй үйлдэл олны шүүмжлэлийг дагуулаад буй. Тодруулбал, тэрбээр өөрийн реп хэсэгт 2022 онд өөрийн дотны найз, олимпийн аварга Н.Түвшинбаярын гарт амиа алдсан Улсын өсөх идэр начин Э.Энхбатын талаар дурдаад “..хэн ч биш болно. Чи бол Э.Энхбат начин. Харин би бол Н.Түвшинбаяр” гэсэн юм. Залуучуудын Азийн аварга шалгаруулах тэмцээнээс хүрэл медаль хүртэж байсан тэрбээр эрэгтэйчүүдийн 73 кг-ын жинд барилддаг жүдоч аж.
Түүний гаргасан эл үйлдэлд барилдах эрхийг зургаан сараар хасах шийдвэрийг гаргасан байна. Тодруулбал, түүнийг гадаад, дотоодын уралдаан, тэмцээнд барилдах эрхийг энэ оны нэгдүгээр сарын 1-ний өдрөөс эхлэн зургаан сарын хугацаатайгаар хассан байна.
