Монголчуудын Англи хэлний мэдлэг Вьетнамчуудаас доогуур эрэмбэлэгджээ

“Education First” олон улсын боловсролын компаниас жил бүр гаргадаг “EF Англи хэлний мэдлэгийн индекс” нь шалгалтад хамрагдсан хүмүүсийн англи хэлний ур чадварын тэгш байдлыг харгалзан, улс орнуудыг эрэмбэлдэг юм. Тус жагсаалтад улс орнуудын англи хэлний мэдлэгийг “Маш өндөр”-өөс “Маш бага” хүртэлх таван түвшний ангилалд хуваадаг байна.

Тэгвэл 2021 оны тайлангаар Монгол Улс 461 оноо авч, “Доод” түвшний мэдлэгтэй улсуудын нэг болсон нь өмнөх онуудтай харьцуулахад нэг түвшин ахисан үзүүлэлт аж. Энэхүү бүлэгт 450-499 оноо авсан улсууд багтдаг бөгөөд сүүлээсээ хоёр дахь түвшин юм. Тус түвшинд багтсан улсуудын иргэд англи хэлээр ярьдаг улсад жуулчилж чадах бөгөөд англи хэл дээрх энгийн яриа болон цахим шууданг ойлгож, харилцах боломжтой гэж тодорхойлсон байна.

Энэ жилийн жагсаалтыг Нидерланд улс тэргүүлсэн бол хамгийн сүүлд буюу 112-р байрт Йемен улс бичигджээ. Азийн орнуудыг тусад нь авч үзвэл, Сингапур улс “Маш өндөр” түвшинтэйгээр 1-р байрт эрэмбэлэгдсэн бол Тажикстан улс “Маш бага” түвшинтэйгээр хамгийн сүүлд жагссан байна.

Уг шалгалтад нийт 24 Азийн орон хамрагдсанаас Монгол Улс 16-р байрт бичигдсэн юм. Тодруулбал, манай улс Вьетнам, Бангладеш, Балба, Шри Ланка зэрэг ази улс орнуудаас доогуур эрэмбэлэгдсэн байна.

Уншигч та бүхэн доорх зургаас энэхүү жагсаалтыг бүтнээр нь харж болох бөгөөд энэ холбоосоор орон, дэлгэрэнгүй мэдээлэлтэй танилцана уу.

Эх сурвалж: www.ef.com