Японы эрдэмтэд Коронавирусийг хэт ягаан туяагаар илрүүлдэг маск бүтээжээ
Японы их сургуулийн эрдэмтэдийн баг хэт ягаан туяагаар гэрэлтдэг, өмссөн хүн коронавирусийн халдвар авсан тохиолдолд гэрэл нь асаж мэдэгддэг шүүлтүүртэй маскны загварыг бүтээжээ.
Энэхүү маск нь эсрэг бие агуулсан флюресцент будагч бодисоор шүршихэд вирусийн ул мөрийг харуулдаг шүүлтүүртэй гэнэ.Эрдэмтдийн баг ирэх 2022 онд энэхүү маскыг худалдаалах зөвшөөрлийг Японы Засгийн газар ногоон гэрлээр дэмжинэ гэж найдаж байгаа аж.
Төслийн баг маск зарах зөвшөөрлийг ирэх онд авна гэж төлөвлөж байгаа аж. Киото мужийн их сургуулийн эрдэмтдийн хийсэн маск нь давхаргууддаа нэмэлт шүүлтүүр агуулдаг ба хэрэв вирус тогтсон байвал хэт ягаан туяаны гэрэлд тэрхүү шүүлтүүр дээр тодорч харагдах аж. Тэд эхлээд тэмээн хяруулд вирусийн идэвхгүй хэлбэрийг тарьж энэ аргыг боловсруулсан ба тэдний өндөгнөөс бактери, вирусийн эсрэг дархлааны системээр үүсгэгддэг уураг болох эсрэг бие гарган авч, флюресцент ашиглан тодорч харагдуулахыг судалжээ.
Судлаач Ясухиро Цукамотогийн хэлж буйгаар ковидын халдвар авсан 32 хүнийг хамруулан 10 хоногийн хугацаанд туршилт хийжээ. Эдгээр 32 хүний зүүсэн амны хаалт руу эсрэг бие цацаж, хэт ягаан туяаны гэрэлд байлгасны дараа тод гэрэлтэн вирусын ул мөрийг харуулжээ. Мөн өвчтөнүүд эдгэрч, вирусийн ачаалал багассанаар ягаан туяа гэрэлтэх нь цаг хугацааны явцад бүдгэрч байгааг тогтоожээ.
Цукамото багийнхан дараагийн шатанд туршилтаар 150 оролцогчид маскаа зүүлгэхийг төлөвлөж байгаа ба ирэх 2022 онд маск худалдаалах зөвшөөрлийг Японы Засгийн газар ногоон гэрлээр дэмжинэ гэж найдаж байгаа аж.
Эх сурвалж: Business Insider
