УИХ-ын дэд дарга С.Одонтуяа: Түлшнээс болж нас барсан найман хүний гурав нь бага насны хүүхэд
УИХ-ын дэд дарга С.Одонтуяа түлшнээс болж угаартаж нас барсан, хордсон иргэдийн асуудал мөн улсынхаа нэр хүндийг гутааж эмэгтэй хүнд хүндэтгэлгүй хандсан хэргийн тухай асуудлаар мэдээлэл өглөө.
Тэрбээр “Тавдугаар сарын 31-ны шөнө 25 хүн угаартаж, найман хүн нас барсан мэдээлэл хэвлэл мэдээллээр явж байгаа. Энэ мэдээллийг бид “Өдрийн сонин”-д ярилцлага өгсөн НЭМҮТ-ийн Номинтуул мэргэжилтний ярилцлагаас авсан.Хачирхалтай нь ийм хэрэг гарчхаад байхад өнөөдөр иргэд албан ёсны газруудаас мэдээлэл авах боломж алга. Бүх газар ярилцлага өгөхөөс татгалзаж байна. Би УИХ-ын Дэд даргын хувьд мэдээлэл авах гээд олдохгүй байна. Буруу мэдээлэл өгч байна. Нас барсан найман хүнээс гурав нь бага насны хүүхэд байсан гэх мэдээлэл явж байгаа. Иймд холбогдох байгууллагуудыг ард түмнийхээ өмнө гарч ирээд үнэн зөв мэдээлэл өгөөч гэж хүсэлт гаргаж байна. Шахмал түлшний асуудал иргэдийн дунд бухимдал түрүүлж байна” гэв.
Он гарснаас хойш 1739 хүн угаартаж, 46 хүн нас баржээ.
