Агуулахад засварын ажил хийж байсан иргэн дээврийн бетон хийцтэй дам нуруунд даруулж нас баржээ

Баянхонгор аймгийн Баянхонгор суманд хуучин ашигладаггүй агуулахын дээвэр нурж нэг хүн дарагдаж, нас барсан харамсалтай осол гарчээ.

Тодруулбал, дээвэр нурж нэг иргэн даруулсан байна гэх дуудлагыг өчигдөр 16:28 цагт онцгой байдлын албаныхан хүлээн авчээ.Улмаар тус аймгийн Онцгой байдлын газрын алба хаагчид 500 метр зам туулан очиход ашигладаггүй хуучин 20х8 метрийн хэмжээтэй агуулахад дотор засварын ажил хийж байсан тус сумын иргэн агуулахын дээврийн бетон хийцтэй дам нуруунд даруулж нас барсан харамсалтай хэрэг гарсан байна.

18:00 цагт цогцсыг гарган тус аймаг дахь Цагдаагийн газрын жижүүрийн бүрэлдэхүүнд шилжүүлэн өгсөн хэмээн Онцгой Байдлын Ерөнхий Газраас мэдээллээ. 

Барилгын ажил, засвар хийхдээ иргэн та анхаарал болгоомжтой байж, аюулгүй байдлаа хангахыг мэргэжлийн байгууллагаас зөвлөж байна.