Д.Ганбат: Өнөөдрийн байдлаар иргэн бүр 30 сая төгрөгийн өртэй

АН-ын бүлэг цаг үеийн асуудлаар мэдээлэл хийлээ.  АН-ын бүлгийн дарга Д.Ганбат “Бүлгийн хуралдаанаар хоёр асуудал хэлэлцлээ.

Нэгдүгээрт, Эрүүгийн хэрэг хянан шийдвэрлэх тухай хуульд нэмэлт өөрчлөлт оруулах хуулийн төсөлд хэрхэвч дэмжиж болохгүй хэд хэдэн зүйл заалт байна. Тухайлбал, доромжлох, гүтгэх заалтыг эрүүгийн хууль руу оруулж байна. Хэвлэлд үзэл бодлоо илэрхийлсний төлөө гүтгэх гэдэг заалтаар эрүүгийн хариуцлага хүлээхээр болсон байна. Энэ буруу. Ийм зүйлийг дэмжиж болохгүй. Намайг “данх” гээд л нэрлэдэг. Хэлж л байна биз. Үүнд эмзэглээд байх зүйл байхгүй. Уг нь сүүлийн хэдэн жил цагдаа хүмүүсийг дураараа дуудаж, гадна хүлээдэг явдаг байхгүй болсон. Гэтэл одоо энэ байдал үгүй болж, цагдаагийн үүдэнд хэн дуртайгаа өдрийн турш үүдэндээ суулгадаг болох гээд байна. Энэ бол хүний эрхийг зөрчсөн үйлдэл.

Хоёрдугаарт, Монгол Улсын өрийн асуудлаар маш хүнд байна. Иргэн болгон өнөөдрийн байдлаар 30 сая төгрөгийн өртэй болчихоод байна. Өнгөрсөн долоо хоногт УИХ-ын дарга Г.Занданшатар өрийн талаар байр сууриа илэрхийлсэн. Үүнтэй санал нэг байгаа. Өрийн асуудлаа шийдэхгүй бол 2030 онд улс орноосоо хөөгдөх вий гэсэн. Бараг 2025, 2026 онд гэхэд л хөөгдөх дээрээ тулаад байна. Ард түмэн үүнийг тэсэхгүй. Тэглээ гээд ард түмэн энэ өрийг төлж болохгүй гэдэгтэй АН санал нэг байна” гэлээ.