Г.Навчаа: Омикроны шинж тэмдэг ханиадтай төстэй болж, амт үнэр алдагдахгүй байна

Эрүүл Мэндийн Яам болон Халдварт Өвчин Судлалын Үндэсний Төв, Нийгмийн Эрүүл Мэндийн Үндэсний Төвийн удирдлагууд цаг үеийн асуудлаар мэдээлэл хийж байна.

Эрүүл мэндийн яамны Анхан, лавлагаа шатлалын тусламжийн хэлтсийн дарга Г.Навчаа эмнэлгийн ачаалал болоод орны зохицуулалтын талаар мэдээлэл өглөө. Тэрбээр, “Омикрон ВА.4, ВА.5 болон бусад дэд хувилбаруудын нэгэн адил амьсгалын дээд замын халдварын шинж тэмдэг ханиадтай төстэй шинж тэмдгүүдийг үүсгэж байна. Үүнд, ханиалгах, нус гоожих, хамар битүүрэх, ядрах зэрэг нь Омикрон халдварыг авсан хүмүүст түгээмэл тохиолдож байна. Энэ удаад ковид-19 вирусийн гол шинж тэмдэг болсон амтлах болон үнэрлэх мэдрэмж алдагдах нь одоо өвчлөгдөж буй өвчтөнүүдийн дунд “бараг” байхгүй. Халуурах, толгой өвдөх, хоолой өвдөх шинж тэмдэг илүү давамгайлж байна.

Энэ удаад давамгайлж буй Омикрон ВА.5 хувилбарын нууц үе харьцангуй богино байгаа. Нэг хүнээс нөгөө хүнд халдварлах хурд хагас өдөр байгаа нь хурдтай тархах хандлага харагдаж байна.

Хамраас нус гоожсон буюу хөнгөн шинж тэмдэг илэрсэн тохиолдолд зайнаас ажиллаж, амны хаалтаа зүүх, өөрийгөө тусгаарлах зэргээр амьдралын дэглэмээ бусдын төлөө өөрчлөх хэрэгтэй. Их хэмжээний шингэн зүйл уух нь хоолойны өвдөлтийг намдаахад тустай буй нь эмнэлзүйн эмчилгээний явцад харагдаж байна.