СЭРЭМЖЛҮҮЛЭГ: “Toyota Crown” маркийн автомашин онхолдож хоёр хүн амиа алдаж, хоёр хүн гэмтжээ

Төв аймгийн Мөнгөнморьт сум “Баруун бүрхийн даваа гэх газарт долдугаар сарын 12-ны үүрээр 02:00 цагийн үед “Toyota Crown” маркийн автомашин онхолдож, жолооч, зорчигч хоёр хүний амь нас хохирч, зорчигч хоёр хүн гэмтсэн зам тээврийн осол бүртгэгдэж, Төв аймгийн Цагдаагийн газар шалгаж байна.

Иймд цагдаагийн газраас дараах сэрэмжлүүлгийг хүргэж байна.

1. Согтууруулах ундааны зүйл хэрэглэсэн үедээ тээврийн хэрэгсэл жолоодохгүй байх.
2. Таны зорчиж явах тээврийн хэрэгслийн жолооч согтууруулах ундаа хэрэглэсэн бол та өөрийн болон бусад хүний амь нас, эрүүл мэнд, аюулгүй байдлын үүднээс шаардлага тавьж, замын хөдөлгөөнд оролцох үйлдлийг таслан зогсоох.
3. Жолооч ядарсан үед, эсхүл хүний биемахбодийн анхаарал хэт сулардаг, нойрмоглолог, үзэгдэх орчин хязгаарлагдмал шөнийн цагаар авто машин барихаас татгалзаж, эрсдлийг зөв тооцож амрах.
4. Тээврийн хэрэгслийн хурдыг замын нөхцөл байдалд зөв тохируулан, хурд хэтрүүлэхгүй, яарахгүй анхаарал болгоомжтой зорчих. Та уралдаанд оролцоогүй, хэт хурдан явж ирэв үү гэж биш “Сайн явж ирэв үү” гэж асуудаг.
5. Жолоочийн анхаарлыг сарниулах гар утас, дүрст бичлэг хэрэглэхгүй байх. Нэг секунд анхаарал сарнихад 10 метрээс дээш газрыг туулчихсан байдаг гэдгийг анхаар.
6. Тээврийн хэрэгслийн бүрэн бүтэн байдлыг тогтмол шалгаж байх. Үүнд: Тормос, гэрэл дохио, дугуй, хөдөлгөөн үйлдэхэд эрсдэл учирч болзошгүй бусад гэмтэл бий эсэх. /Муу дугуйтай бол зуны улиралд явдал дундаа бууддаг, гол ус, тогтсон шавар, усаар гарсан тохиолдолд тормос мууддаг гэдгийн анхаар.
7. Хөдөлгөөн үйлдэхээс өмнө тээврийн хэрэгслийн эргэн тойрныг бүрэн шалгаж хэвших. Үүнд: бага насны хүүхэд машины ард, урд талд нуугдаж тоглож байгаа эсэх, ялангуяа хөдөө орон нутгийн бага насны хүүхэд машин сонирхох, сүүдэр бараадах, тэр бүр авто машинтай ойр байдаггүй тул хотоос ирсэн машины эргэн тойронд сонирхох, тоглох эрсдэл өндөр тул анхаарах.
8. Хөдөө орон нутагт зорчих замын эвдрэл, гэмтэл, үер ус, замын саад тотгор эрсдлийн нөхцөл байдлыг урьдчилан тооцох, зөв сонгох.
9. Тээврийн хэрэгслийг жолоодох эрхгүй, сурч дадлагажаагүй хүнд жолоо шилжүүлэхгүй байх. Замын хөдөлгөөний дүрэм бол Дураар аашлах тоглоомын дүрэм биш Амьдралын дүрэм буюу амьд явах, эрүүл явах дүрэм гэдгийг ямагт санаж явах.
10. Олноороо хөөрч баярлаж явахдаа авто машины цонхоор биеэр ил гарах гэх мэт зориулалт бус үйлдэл нь “Олон хавар нэгэндээ” гэдгийн адил хэлж ирдэггүй хийсч ирдэг гэнэтийн үхэл дагуулж болзошгүйг анхаар.
11. Зориулалтын бүсийг жолоочоос гадна, урд, ард сууж яваа зорчигч мөн зүүж явах нь аминд өлзийтэйг сана.
12. Бага насны хүүхдийг зориулалтын суудалд ард талд бэхлэж суулгах заавартай. Ихэнх тохиолдолд жолоочийн хажууд бага насны хүүхдийг тэвэрч, мөн цонх онгойлж явах нь гэнэт осолд тухан хүүхэд хамгийн түрүүн шидэгддэг тохиолдол амьдралд их байгааг анхаар.