Я.Гантөмөр: Үнэтэй, чанартай аврагчийн хувцас авахаар төсөв дутаад, тоо нь багасдаг
Онцгой байдлын байгууллагын алба хаагчдын хувцас хэрэглэл хангамж, стандартын талаар өнөөдөр мэдээлэл өглөө.
ОБЕГ-ын Санхүү хангалт, хөрөнгө оруулалтын газрын дарга, хурандаа Я.Гантөмөр “Онцгой байдлын байгууллагын хувцас хангалтыг гурав ангилдаг.
- Техник
- Хүн нэг бүрийн хамгаалах хэрэгсэл буюу тусгай зориулалтын хувцас хэрэглэл
- Өдөр тутмын хувцас хэрэглэл.
Онцгой байдлын хэмжээнд Польш, Беларусь, Франц улсын өндөр чанартай техникүүдээр тоноглогдож байна. Улсын төсвийн хөрөнгө оруулалтаар Toyota загварын автомашинаар парк шинэчлэлийг хийж байгаа юм.
Хүн нэг бүрийг хамгаалах тусгай зориулалтын хувцас, багаж техникийн хувьд улсын төсөвт тавигдсан мөнгөний хэмжээгээр худалдан авалтаа зохион байгуулдаг.
Өдөр тутмын хувцас хэрэглэлийг улсын төсөвт тавигдсан хөрөнгийн хэмжээгээр алба хаагчдад авч өгдөг.
Алба хаагчдын хувцас хэрэглэлд мөрдөгддөг стандарт байдаг. Тухайлбал галын хувцсанд тэдэн градуст тэсвэртэй байх шаардлага тавигддаг.
Өндөр үнэтэй, чанартай хувцас байж болно, энэ хэмжээгээр худалдан авах тоо нь багасдаг асуудал тулгардаг юм. Тийм учраас Монгол орны цаг агаарт тохирсон, боломжийн үнэтэй хувцас хэрэглэлийг авахыг зорьж ажилладаг юм” хэмээн ярилаа.
Дөрвөн алба хаагч дундаа нэг хувцастай гэх мэдээллийн тухайд “Тусгай зориулалтын усны хувцас өндөр үнэтэй байдаг. Дотроо усны хуурай болон нойтон гэж ангилагддаг бөгөөд хуурай хувцас нь өндөр үнэтэй учир дөрвөн аврагч тутмын нэг нь усны хувцастай байгааг Г.Ариунбуян дарга хэлсэн” хэмээн сэтгүүлчийн асуултад хариуллаа.
