Б.Сэр-Од: Олимпын бэлтгэлээ Японд базааж байна. Тэндээсээ шууд Парис руу явна
Өнөөдөр Монгол Улсын Ерөнхийлөгч У.Хүрэлсүх “Парис 2024” зуны олимп болон паралимпын наадамд оролцох баг тамирчдыг Төрийн ордонд хүлээн авч, далбаа гардуулах ёслолын ажиллагаанд оролцсон билээ.
Монгол Улсын гавьяат тамирчин Бат-Очирын Сэр-Од зургаа дахь олимпдоо оролцохоор бэлтгэлээ хангаж байна. Өдгөө 42 настай марафонч эр 2004 оны Афины олимпод анх оролцож байв.
Б.Сэр-Од өмнө нь 2012 оны Лондоны олимпод тугчаар сонгогдсон нэгэн. Зуны олимпын түүхэнд хамгийн олон удаа тугчаар сонгогдсон хүн бол жүдоч Б.Бат-Эрдэнэ билээ. Тэрбээр 1988, 1992, 2000 оны олимпод тугчаар сонгогдсон түүхтэй.
Харин түүнээс хойш хоёр дахь удаагаа тугчаар сонгогдсон хүн бол Б.Сэр-Од. Тэрбээр энэ талаар “Үгээр хэлэхийн аргагүй сайхан мэдрэмж төрлөө. Марафон гүйлтээр олимпын наадамд зургаан удаа оролцсон түүх үгүй. Өдий зэрэгтэй амжилт үзүүлж, эх орныхоо нэрийг гаргахад хувь нэмрээ оруулсан олон хүнд талархаж буйгаа илэрхийлье. Миний хувьд олимпын бэлтгэлээ Японд базааж байна. Маргааш Япон руу буцна. Тэндээсээ шууд Парисыг зорихоор болсон. Зургаа дахь олимпын наадамд бүх сэтгэл зүрхээ зориулж уралдахаа амлаж байна” гэж ярьсан юм.
ЗУНЫ ОЛИМПЫН ТУГЧ
| Он | Нэр | Төрөл |
| 1964 | Ч.Найдан | Дугуй |
| 1968 | Х.Баянмөнх | Чөлөөт бөх |
| 1972 | Б.Жамсран | Чөлөөт бөх |
| 1976 | З.Ойдов | Чөлөөт бөх |
| 1980 | З.Дүвчин | Чөлөөт бөх |
| 1988 | Б.Бат-Эрдэнэ | Жүдо |
| 1992 | Б.Бат-Эрдэнэ | Жүдо |
| 1996 | Д.Сумьяабазар | Чөлөөт бөх |
| 2000 | Б.Бат-Эрдэнэ | Жүдо |
| 2004 | Д.Нямхүү | Жүдо |
| 2008 | М.Баяржавхлан | Жүдо |
| 2012 | Б.Сэр-Од | Хөнгөн Атлетик |
| 2016 | Б.Тэмүүлэн | Жүдо |
| 2020 | Ө.Дүүрэнбаяр, О.Хулан | Жүдо, сагсан бөмбөг |
| 2024 | Б.Сэр-Од, О.Есүгэн | Хөнгөн Атлетик, бокс |
