Эрдэнэтолгой орчимд ус зайлуулах 220 метр шугам угсарч эхэллээ

Баянзүрх дүүргийн 24 дүгээр хороо, Эрдэнэтолгой орчимд ус зайлуулах 220 метр шугам угсарч эхэллээ. Ус зайлуулах шугам хоолойг энэ сарын 26-нд угсарч дуусна. Үүний дараа Эрдэнэтолгой гудамжны уулзвараас Газарчин дээд сургууль хүртэлх авто замыг шинэчилнэ.

Тодруулбал, 065 дугаар цэргийн ангийн ойролцоо таван байршилд усны ундарга шинээр үүссэн. Улмаар Эрдэнэтолгой гудамжны уулзвараас Газарчин дээд сургууль хүртэлх авто зам дагуу ус тогтож, эвдрэл үүсээд байгаа юм. Нийслэлийн Засаг дарга бөгөөд Улаанбаатар хотын Захирагч Х.Нямбаатар инженерийн шугам сүлжээг цогцоор нь шийдэхийг холбогдох албаныханд үүрэг болгож, ус зайлуулах шугам хоолойг нийслэлийн Засаг даргын нөөц хөрөнгөөр шинээр хийхээр болсон юм.

Геодези, Усны барилга байгууламжийн газрын дарга Б.Бямбасайхан “ Эрдэнэтолгой орчимд ус зайлуулах 220 метр шугам угсарна. Уг ажлыг 10 хоногт хийж гүйцэтгэхээр төлөвлөж байна. Ус зайлуулах шугам хоолой угсарч дууссаны дараа авто замыг шинэчилнэ” гэлээ.

Баянзүрх дүүргийн 24 дүгээр хороонд байршилтай Баганат хороолол орчимд усны халиа ихээр үүсдэг, гүн жалга байсан. 2017 онд тус хорооллыг барихдаа дээрх нүхэн жалгыг дарснаас үүдэн хөрш ус гараад байгааг Геодези, Усны барилга байгууламжийн газрын Ерөнхий инженер С.Батсайхан хэллээ.