Цагдаагийн газраас хүний эрхийг зөрсөн үйлдэлдээ хүлцэл өчжээ
Өчигдөр /2022.03.19/ Завхан аймгийн Тэлмэн сумын иргэн архи согтууруулах ундаа хэрэглэсэн үедээ мотоцикл барьсан гэх шалтгаанаар тус аймгийн Цагдаагийн алба хаагч нар 4-5 шонгийн модонд гавласан талаарх мэдээллийг бид өмнө нь хүргэж байсан билээ.
Харин энэ асуудал олон нийтийн сүлжээнд тархсан даруйд Завхан аймгийн Цагдаагийн газраас хүний эрх зөрчиж, хасах хэмд гадаа гавласандаа уучлал хүссэн мэдэгдэл гаргажээ.
Тус мэдэгдэлд , “2022 оны 03 дугаар сарын 19-ний өдрийн 13 цаг 51 минутад Завхан аймгийн Тэлмэн сумын Ерөнхий боловсролын сургуулийн дотуур байрны багш Ц-ээс “Дотуур байранд согтуу хүн орж ирээд хүүхдээ хөдөө гэр рүүгээ авч явна гээд хэрүүл маргаан үүсгээд байна” гэх дуудлага, мэдээлэл ирүүлснийг тус сумын хэсгийн төлөөлөгч, хэсгийн цагдаагийн хамтаар хүлээн авч холбогдох шалгалтын ажиллагааг хийхэд тус сумын Баян айраг багт оршин суух иргэн “М” нь Зөрчлийн тухай хуулийн 14.7 дугаар зүйлийн 5 дахь хэсгийг зөрчиж “тээврийн хэрэгсэл жолоодох эрхгүй, согтууруулах ундааны зүйл хэрэглэсэн үедээ мотоцикл жолоодсон болох нь тогтоогдсон тул тээврийн хэрэгслийг Цагдаагийн албаны тухай хуулийн 33 дугаар зүйлд заасны дагуу түр саатуулах хашаа /байр/-д байрлуулж, Цагдаагийн албаны тухай хуулийн 52 дугаар зүйл /Нэг бүрийн тусгай хэрэгсэл хэрэглэх/, Хууль зүй дотоод хэргийн сайд, Улсын ерөнхий прокурорын хамтарсан 2017 оны А/224, А/102 дугаартай “Биеийн хүч, тусгай хэрэгсэл, галт зэвсэг хэрэглэх заавар”-ын Гуравдугаар бүлгийн 3.4.е /Гавыг хүний амь нас, эрүүл мэндэд хохирол учирхааргүй үл хөдлөх зүйлээс түр хугацаагаар холбох/ дэх заалтыг үндэслэн зөрчил гаргасан иргэнд нэг бүрийн тусгай хэрэгсэл хэрэглэсэн байна.
Энэхүү журмыг хэрэглэхдээ хүний эрхийг зөрчиж хасах хэмд гадаа иргэнийг гавласан асуудалд Аймгийн цагдаагийн газраас тухайн иргэнээс ХҮЛЦЭЛ өчиж байна.
Цаашид гэмт хэрэг, зөрчилтэй тэмцэх үйл ажиллагаа явуулахдаа хүний эрхийг дээдлэн иргэнтэй хүндэтгэлтэй харьцаж байх талаар нийт алба хаагчдад үүрэг ажлын чиглэл өгч ажиллаж байна”
Эх сурвалж : ЗАВХАН АЙМАГ ДАХЬ ЦАГДААГИЙН ГАЗАР
Ж.ХАЛИУН
