Хайрттайгаа хамтдаа үзэх 10 романтик кино

 ABOUT TIME

Арван найман нас хүрэв үү үгүй юу аав нь хүүдээ гэр бүлийнх нь эрчүүд цөм өнгөрсөн лүү аялах чадвартайг хэлж гүн шоконд оруулснаар эхлэх энэ бүтээлд өдөр бүрийн үнэ цэн, өрөөлийн болоод өөрийн жаргалын тухай тун гэгээлгээр өгүүлсэн билээ. Хөнгөхөн хийгээд сэтгэлд хүрсэн кино үзэхээр зэхэж буй хэн бүхэнд энэхүү бүтээлийг санал болгож байна.

 ONCE

Гудамжны дуучин залуу, сонгодог төгөлдөр хуурч бүсгүй хоёр хөгжмийн хөг эгшгээр учран, нэг нэгэндээ дурлах явцыг харуулах эл кино Ирландын зөөлхөн салхийг сэтгэлд тань салхилуулам энгийн агаад энхрий хайрын түүхийг таны дэлгэцнээ авчрах буй.

 BLUE VALENTINE

Бяцхан охиноо өсгөхийн зэрэгцээ цаг хугацааны цахилаанд нуран унаж буй харилцаагаа хамгаалахыг хичээх залуу хосын тухай өгүүлэх энэхүү бүтээлд танд нэгийг бодуулж хоёрыг тунгаалгах нь лавтай.

 THE BRIDGES OF MADISON COUNTY

1960-аад оны Холливүүдийн “алт” гэгддэг алдарт Клинт Ийствүүдийн найруулаад зогсохгүй өөрөө Мэрил Стрийпийн хамт дүр бүтээсэн энэхүү бүтээлд хугасхан учрал, хоосон харууслыг харуулсан төдийгүй Хойд Америкын үзэсгэлэнт байгалийг тун үзэсгэлэнтэйгээр буулгажээ.

 ETERNAL SUNSHINE OF SPOTLESS MIND

Дурсах дургүй дурсамжаа бодлоосоо үүрд устгах боломж байсан бол та яах вэ? Эл асуултанд тун сонирхолтойгоор хариулах тус кино хүний сэтгэл хөдлөл, хайрлах, хайрлуулах болоод дөрвөн улирал мэт хүйтэрч, дулаарах харилцааны динамикыг нэгэн хосуудын харилцаагаар харуулна. Мэдрэмж ба дурсамжин хэлхээ гэхчлэн хүмүүний дотоод ертөнцийг дэлгэцнээ тольдох эл бүтээлийн хэсэг бүр гойд сонин үзэгдлээр дүүрэн байдаг нь энэхүү киног үзэх онцгой шалтгаануудын нэг.

 10 THINGS I HATE ABOUT YOU

90-ээд оны фэминизм, ахлах сургуулийн ахархан шохоорхол, гранж рокын эргэн тойронд өрнөх энэхүү бүтээлийг алдарт Шекспирийн “Хэрүүлч эмийг номхотгох нь” хэмээх жүжгээс сэдэвлэсэн бөгөөд уг зохиолын санааг алдагдуулалгүй тухайн үеийнхээ нийгмийн хэм хэмжээнд улбаалуулан бүтээсэн нь магтууштай.

WHEN HARRY MET SALLY

Романтик кино фанатуудын хайртай бас нэгэн классик бүтээл. Их сургуулиа дүүргэж, амьдралын босгон дээр зогсож байхдаа танилцан түр нөхөрлөөд зам салсан Харри, Салли хоёр таван жилийн дараа дахин уулзснаар үйл явдлын ээдрээ эхэлнэ.

PORTRAIT OF A LADY ON FIRE

70 оны Францад өрнөх энэхүү бүтээлд хуримлах гэж буй язгууртан бүсгүй болон түүний сүйн хөргийг зурахаар хөлслөгдсөн зураачийн хоорондох хориотой хайр сэтгэлийн холбоог үзэсгэлэнтэй үзэгдэл зураглалын гайхамшигтай хослуулан кино хальсанд буулгасан.

BRIDGET JONES DIARY

Алдарт Жэйн Остины “Бахархал ба Бардамнал” зохиолыг ид бужигнаж, түм түжигнэх 2000 оны Лондонд өрнүүлсэн эл кино нь Бриджит хэмээх ганц бие бүсгүй хэрхэн ажил, амьдралаа тэнцүүлж ядан явааг хөгжилтэйгөөр харуулсан бөгөөд ром-ком кино фэнүүдийн хайртай бүтээлийн тоонд зүй ёсоор багтдаг билээ.

BEFORE SUNRISE TRILOGY

Наран жаргахаас үүр хаяарах хоорондын тэнгэр мэт хором азнахгүй хувьсан өөрчлөгдөх хосуудын харилцааг Жэссэ болон Сэлиний амьдралын харилцан адилгүй үеүдээр харуулах энэхүү гурван анги бүхий цувралд цаг хугацааг тун үзэсгэлэнтэйгээр тусгасан нь үзэгчдийн сэтгэлд хэдэн аравны турш тодоос тод дурсагдах дурсамжийг үлдээжээ.