Говь-Алтай аймагт тарваган тахал бүртгэгдэж, хөл хорио тогтоов
Говь-Алтай аймагт бүртгэгдсэн тарваган тахлын сэжигтэй тохиолдол лабораторийн PCR шинжилгээний дүнгээр эерэг гарч, онош батлагдлаа.
Энэ талаар Зоонозын өвчин судлалын үндэсний төв “Голомтод халдварын эх уурхайг тогтоохоор ажиллаж байна.Нэгдүгээр хавьтлуудаас тарваган тахлын эмнэл зүйн шинж тэмдэг илрээгүй, эмчийн бүрэн хяналтад орсон.Эцсийн халдваргүйжүүлэлтийг нийт 680 м.кв талбайд хийлээ.Эрсдэлт бүлгийн иргэдэд мэдээлэл сурталчилгааны ажлыг эрчимжүүлж, аймгийн Онцгой комиссоос гаргасан шийдвэрээр хөл хорионы дэглэм үргэлжилж байна” гэж мэдээллээ.
Тарваган тахал нь шууд хавьтал, дам халдвар, агаар дусал, хоол хүнсээр дамжин халдварладаг учир өвчин туссан хүн бусдад тараах магадлал их байдгийг тус төвөөс анхаарууллаа.
Говь-Алтай аймгийн Бугат суманд тарваган тахлын сэжигтэй тохиолдол илэрч, зургаадугаар сарын 27-ноос аймгийн төвөөс гарах хөдөлгөөн, Бугат сумд өндөржүүлсэн бэлэн байдал зарлаж, орох, гарах хөдөлгөөнийг тус тус зургаан хоногоор зогсоогоод байгаа тухай мэдээлж байв. Уг сэжигтэй тохиолдол шинжилгээгээр тарваган тахал болох нь батлагджээ.
