Х.Нямбаатар: ТҮК-ийн ажилтнуудад чирч явдаг, том хэмжээтэй тоос сорогч авч өгөхөөр судалж байна

ТҮК-ийн ажилтнуудын цалинг нэмж, хүрз, шүүр хоёроос нь салгана хэмээн Хотын дарга Х.Нямбаатар өнгөрсөн арваннэгдүгээр сард мэдээлж байв.Тэрбээр цэвэрлэгээний ямар техник хэрэгсэл авах гэж байгаагаа өчигдөр танилцуулсан юм.

Тодруулбал, ТҮК-ийн ажилтнуудад чирч явдаг, том хэмжээтэй тоос сорогч авч өгөхөөр судалж байгаа аж. Үүнээс гадна 2006 оны тогтоолоор тэдний цэвэрлэсэн талбайн нэг м.кв-ыг 50 төгрөгөөр үнэлснийг өсгөхөөр төсвөө баталсан байна. Ирэх долоо хоногт шинэчилсэн журам НИТХ-аар батлагдахаар хот, нийтийн аж ахуйн үйлчилгээний ажилчдын цалин хоёр дахин нэмэгдэх юм.

Харин цас цэвэрлэгээний тухайд өвлийн улиралд явган хүний зам дээр дагтаршсан цасыг цэвэрлэдэг тросон сойтогтой эргэлддэг тоног төхөөрөмж авахаар судалж байгаа бол авто зам дээр давс цацахгүйг мэдэгдсэн юм. Учир нь сүүлийн үед дотоодын давсны өртөг гадаадаас авч буй бодисын өртөгтэй бараг адил байгаа юм байна.Гэхдээ гаднын улсаас мэргэжилтнүүд авчирч, давс, бодисыг ямар хэмжээгээр цацах талаар сургалт авч байгаа аж.