Ноцтой ослын улмаас 1 хүүхэд амиа алдаж, 2 хүүхэд, 1 том хүн эрчимт эмчилгээний тасагт эмчлүүлж байна
Чингэлтэй дүүргийн 15 дугаар хорооны нутаг дэвсгэр Хайлааст орчимд өчигдөр /2024.04.17/ 19 цагийн үед Toyota Prius маркийн автомашин Hyundai Verna маркийн автомашинтай мөргөлдсөн ноцтой осол гарсан.
Тус ослын талаар ЦЕГ-ын Хэвлэл, мэдээллийн төвийн мэргэжилтэн Э.Энхзаяагаас тодруулахад,
“Ослын улмаас явганаар зорчиж байсан 4-16 насны зургаан хүүхэд, насанд хүрсэн нэг хүнийг мөргөсөн осол бүртгэгдсэн. Ослын улмаас харамсалтайгаар 16 настай охин газар дээрээ амиа алдсан” гэлээ.
Бусад зургаан хүний биеийн байдлыг ГССҮТ-ийн хэвлэл мэдээллийн ажилтан Р.Мөнгөнцэцэгээс тодруулахад
“Нэг том хүн, хоёр хүүхэд “Эрчимт эмчилгээний тасаг”-т хэвтэн эмчлүүлж байна. Мөн хоёр хүүхэд “Хүүхдийн мэс заслын тасаг”-т, нэг хүүхэд “Толгойн мэс заслын тасаг”-т хэвтэн эмчлүүлж байна. Эрүүл мэндийн байгууллагын зүгээс үйлчлүүлэгчдийн биеийн байдлыг тогтворжуулах, нарийн мэргэжлийн үзлэг оношлоогоог хийсэн бөгөөд шаардлагатай тусламж үйлчилгээг цаг алдалгүй үзүүлж байна” гэлээ.
