Х.Наранжаргал: хэвлэл мэдээллийн эрх чөлөөний тухай хууль хүний эрхэд суурилсан байх ёстой

Хэвлэл мэдээллийн эрх чөлөөний тухай хуулийн төслийн 4-р хэлэлцүүлгийг судлаач, төр-иргэний нийгмийн байгууллагын төлөөллийн дунд зохион байгууллаа. Хэлэлцүүлэгт төрийн төлөөллөөс УИХ-ын гишүүн Д.Энхтуяа, сэтгүүл зүйн чиглэлээр мэргэжилтэн бэлтгэдэг их, дээд сургуулийн эрдэмтэн, судлаачид болон иргэний нийгмийн байгууллага, холбоодоос 30 гаруй төлөөлөл оролцлоо.

Хуулийн төсөл нь хэвлэн нийтлэх эрх чөлөөтэй холбоотой нэр томьёог тайлбарласан нийтлэг үндэслэл, хараат бус байдлын баталгаа, байгууллагын хэлбэр, ил тод байдал, мэдээллийн эх сурвалжийг хамгаалах эрхийг баталгаажуулах, салбарын өөрийн зохицуулалтын байгууллагын эрх зүйн үндэс бүхий 6 бүлэг 18 зүйлтэйгээр боловсруулагдсан байна.

Өнгөрсөн хугацаанд Хэвлэл мэдээллийн эрх чөлөөний тухай хуулийн төслийг Ерөнхийлөгч, УИХ, Засгийн газраас тус бүр санаачлан боловсруулсан боловч өргөн баригдахаас өмнө буцсаар өдий хүрчээ. 1998 онд анхлан багтлагдсан тус хууль цөөхөн зүйл, заалттай хэдий ч өдий хүртэл үүргээ сайтар гүйцэтгэж чадсан. Харин нийгэм, цаг үе өөрчлөгдсөн өнөөгийн нийгэмд сэтгүүлч, хэвлэл мэдээллийн салбарын олон талт харилцаанд тохируулан сайжруулан шинэчлэх шаардлага буй талаар оролцогчдын олонх нь санал нэгдсэн.

Түүнчлэн Хэвлэлийн мэдээллийн эрх чөлөөний тухай хуулийн хамгийн чухал зохицуулалт төрөөс ангид байх ёстой. Нөгөөтэйгүүр, Ардчилсан улс орнуудад хэвлэл мэдээллийн байгууллагууд нь зах зээлийнхээ жамаар сайн, муугаараа ялгараад явах учиртайг сануулж, цаашлаад бусдын үзэл санаанд хэт нийцүүлэх гэж хичээгээд хуулийн төслийн үзэл санааг алдагдуулах эрсдэлтэйг анхааруулсан. Мөн уг хуулийн хамгийн чухал агуулга нь хүний эрхэд суурилсан байх учиртайг “Глоб интернэшнл” төвийн Удирдах зөвлөлийн дарга Х.Наранжаргал санууллаа.

Зарим оролцогчдын зүгээс хуулийн төслөөр хэвлэл мэдээллийн хэрэгсэл гэдгийг илүү тодотгож, цахим орчинд олон дагагчтай нөлөөлөгчдөөс салгаж өгсөн нь чухал бөгөөд мэргэжлийн байгууллага, түүнд ажиллаж байгаа сэтгүүлчдийн үйл ажиллагааны баталгааг хангасанд талархалтай байгаагаа илэрхийлсэн.

Хуулийн төслийн хэлэлцүүлгийг салбарын хэмжээнд нийт 4 удаа зохион байгуулснаас Хууль зүй, дотоод хэргийн сайд О.Алтангэрэл бүгдэд нь биечлэн оролцож, асуултад хариулж ажиллалаа. Салбарын сайдын зүгээс УИХ-ын энэ намрын чуулганд өргөн барихаар бэлтгэж буй Хүний эрхийн багц хуулиудад багтаж буй Хэвлэл мэдээллийн эрх чөлөөний тухай хуулийн шинэчлэлийг олон жилийн гацаанаас гаргаж чадвал сэтгүүл зүй, хэвлэл мэдээллийн салбар, цаашлаад нийгэм-улс орны хэмжээнд хүний эрх, эрх чөлөөг сахин хамгаалах үйлсэд томоохон алхам болно гэж үзэж байгаа юм.