АТГ: Нүүрсний асуудалтай холбогдуулан 30 хүнийг яллагдагчаар татан ажиллаж байна

Засгийн газрын ээлжит бус хуралдаанаас гарсан шийдвэрийн талаар мэдээлэл хийх үеэр Авлигатай тэмцэх газрын Дэд дарга, эрхэлсэн комиссар Г.Азжаргал дараах зүйлийг ярьлаа. Тэрбээр,

“АТГ-аас “Эрдэнэс Тавантолгой” ХК, “Тавантолгой төмөр зам” ХК-ийн эрх бүхий албан тушаалтнууд тендер сонгон шалгаруулах, нүүрс худалдах, худалдан авах гэрээ байгуулах, тээвэрлэх, улсын хилээр хууль бусаар нэвтрүүлэх, олон улсын ачаа тээврийн С зөвшөөрөл олгох, нүүрс тээврийн төмөр замын барилгын ажил гүйцэтгэхдээ бусдад давуу байдал олгосон, хахууль авсан, үндэслэлгүйгээр хөрөнгөжсөн байж болзошгүй хэрэг бүртгэлтийн 11, мөрдөн байцаалтын 7 хэрэгт мөрдөн шалгах ажиллагаа явуулж байна.

Мөрдөн байцаалтын 7 хэрэгт 47 объектод нэгжлэг хийж, 15 хүний хойшлуулшгүйгээр баривчилж, 10 хүнд цагдан хорих, таслан сэргийлэх арга хэмжээ авснаас өнөөдрийн байдлаар 6 хүнийг цагдан хорьж байна.

Нийт 30 хүнийг яллагдагчаар татлаа. Үүнээс 7 албан тушаалтныг хахууль авах гэмт хэрэгт, 16 хүнийг хахууль өгөх гэмт хэрэгт, 5 албан тушаалтныг албан тушаалаа урвуулан ашиглаж, их хэмжээний хохирол учруулсан гэмт хэрэгт, хоёр хүнийг үндэслэлгүйгээр хөрөнгөжсөн гэмт хэрэгт эрүүгийн хэрэг үүсгэж яллагдагчаар татан ажиллаж байна” гэлээ.