Мэс заслын 800 гаруй сувилагч чуулав
Эрүүл мэндийн яам УНТЭ, ГССҮТ, Монгол-Японы эмнэлэг, “Сувилахуйн амьдрал” ТББ-тай хамтран Монголын мэс заслын сувилагчдын анхдугаар зөвлөгөөнийг “Үйлчлүүлэгчийн аюулгүй байдалд мэс заслын сувилагчийн оролцоо” сэдвийн хүрээнд Төрийн ордонд өнөөдөр зохион байгууллаа.
Мэс заслын сувилахуйн тусламж, үйлчилгээний чанар, аюулгүй байдлыг сайжруулахад сувилагчдын оролцоог хангах, тэдний мэдлэг, чадвар, хандлагыг нэмэгдүүлэх зорилготой уг зөвлөгөөнд мэс заслын 800 гаруй сувилагч оролцов.
Анхдугаар зөвлөгөөнийг нээж Эрүүл мэндийн дэд сайд С.Энхболд хэлэхдээ, мэс заслын эмчилгээний түүхэн хөгжлийн явцад үе үеийн эмч нарын оролцоотой мэс заслын сувилагчийг чадавхжуулах, дагалдан сургах, мэргэшүүлэх сургалтад хамруулан мэс заслын сувилагч нарыг бэлтгэж ирснийг онцоллоо. Мөн тэрбээр “Эрүүл мэндийн салбарын хамгийн эрхэм зорилгын нэг бол үйлчлүүлэгчийн аюулгүй байдлыг хангах, тэдэнд чанартай, хүртээмжтэй тусламж, үйлчилгээг үзүүлэх явдал юм. Үйлчлүүлэгчийн аюулгүй байдалд хүнээс буюу эмч мэргэжилтний мэдлэг, чадвар, харилцааны доголдлоос, тогтолцооны гажуудал буюу удирдлагын зөв менежмент дутагдсанаас, техникийн буюу тоног төхөөрөмжийн хүрэлцээ, чанар, хангалтаас шалтгаалж алдаа гарах нөхцөл бий болж байна. Иймээс ДЭМБ-ын Номхон далайн баруун эргийн бүсээс 2021 онд Мэс заслын тусламж, үйлчилгээний хүртээмжийг сайжруулах, тогтолцоог боловсронгуй болгож, бэхжүүлэх зорилгоор гаргасан “Аюулгүй мэс заслын үйл ажиллагааны хүрээ 2021-2030”-г улс орнууд хэрэгжүүлж байгаагийн нэгэн адил манай улс ч бас 2021 оноос эхлэн хэрэгжүүлж эхлээд байна” гэв.
Эрүүл мэндийн тухай хууль, Эмнэлгийн тусламж, үйлчилгээний тухай хуульд заасны дагуу Сувилахуйн дагнасан тусламж, үйлчилгээг үзүүлэх Сувилахуйн төвийг 2022-2023 онд сувилагчдын санаачилгаар “Өмнөговь аймагт “Мөнхөд-Энх” сувилахуйн төв, Архангай аймагт “Эрүүл зан үйл”, Сүхбаатар аймагт “Од” сувилахуйн төв, Улаанбаатар хотод “Гэгээ” төв тус тус шинээр байгуулсан нь иргэдэд мэс заслын дараах сувилахуйн тусламж үйлчилгээг ойртуулсан томоохон ажил болсныг мөн тэрбээр тэмдэглэв.
ДЭМБ-ын дэмжлэгтэй “Мэс заслын тусламж, үйлчилгээний өнөөгийн байдал, мэс заслын тусламж, үйлчилгээний хүртээмж, үйлчилгээ, аюулгүй, цаг алдалгүй тусламж, хүний нөөц, шаардагдах дэмжлэгийг тодорхойлох” зорилгоор нийт эрүүл мэндийн 17 байгууллагыг хамруулан хийсэн үнэлгээний үр дүн, Эрүүл мэндийн сайдын 2022 оны А/136 дугаар тушаалаар баталсан “Эрүүл мэндийн тусламж, үйлчилгээний чанар, аюулгүй байдлын үйл ажиллагааны төлөвлөгөө”, ДЭМБ-ын “Аюулгүй мэс заслын үйл ажиллагааны хүрээ 2021-2030”-г хэрэгжүүлэхийн тулд мэс заслын сувилахуйн тусламж, үйлчилгээний чанар, аюулгүй байдлыг сайжруулахад оролцоог хангах, мэс заслын сувилагч нарын мэдлэг, чадвар, хандлагыг нэмэгдүүлэх зайлшгүй шаардлага тулгарч буй зэрэг сэдвээр мэс заслын сувилагч нар үндэсний чуулганаараа ярилцсан юм.
