10-11 насны охидтой фэйсбүүкээр найз болж, хүчирхийлэхийг завджээ

Хууль зүй, дотоод хэргийн сайд Х.Нямбаатар өнөөдөр Төрийн мэдээлэл өгөх үеэрээ цахим гэмт хэрэг эрс өсөж байгааг анхааруулсан юм.

Тэрбээр: “Өсвөр насны охидтой цахимаар танилцан, үерхэж нөхөрлөж буй мэт дүр эсгэн, улмаар тухайн охины биеийн зургийг авсны дараа охиныг айлган дарамталж, бэлгийн харилцаанд орсон, хүчирхийлсэн хэргүүд хэд хэд гарлаа. Иймд бид олон нийт, эцэг эхчүүдэд анхааруулж байна. Охидын итгэлийг авч, зураг бичлэгийг нь гартаа оруулсны дараа “Чиний зургийг ил тавина” гэж айлган, дарамталдаг.

Налайх дүүрэгт нэг этгээд бага насны хүүхдийг ийм замаар хүчирхийлэхээс өмнө нь цагдаа нар амжиж барьсан. Ийм төрлийн гэмт хэрэгт 10-11 насны охид өртлөө. Хүүхдүүдийн цахим хэрэглээнд анхаарч, танихгүй хүнтэй фэйсбүүкээр найз болохгүй байх, чаатлахгүй байх, хувийн мэдээллээ өгөхгүй байх, биеийнхээ аль нэг хэсгийг ил гаргасан зураг, бичлэгийг бусдад өгөхгүй байхыг анхааруулаарай” гэв.

Хэрэв танай хүүхдэд, найз нөхдөд бусдаас зураг видеогоо ирүүлэх санал ирсэн бол Эрүүгийн цагдаагийн байгууллагад яаралтай мэдээлж, бидний ажилд туслалцаа үзүүлнэ үү гэв.